İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 355 Hüküm no: 407 Orijinal metin no: [58b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nalbant esnafı kalfası Ali b. Ahmed’e usta olmadıkça dükkân açamayacağının tenbihi Nalbant esnâfı kalfaları usta olmadıkça dükkân küşâdı men‘i Ma‘rûz Âsitâne-i aliyyede vâki‘ nalbant esnâfının kethüdâsı Osman Ağa ve yiğitbaşı Hâfız Mehmed ve müsinn-i ihtiyârlarından mütevellî Veliyüddin ve Süleyman ve Karagümrükî Ahmed ve Hâfız Hüseyin ve Hâfız el-Hâc Ali ve Mehmed ve diğer Mehmed ve Hacı Mehmed ve İsmail ve Ahmed ve Mustafa ve Hacı Ahmed vesâirleri meclis-i şer‘-i enverde es-Seyyid Ali b. Ahmed mahzarında mezbûr es-Seyyid Ali esnâfımız kalfalarından olup lâkin kendi ırzıyla mukayyed ve kâr u kesbiyle meşgūl olmadığından mâ‘adâ hilâf-ı nizâm usta olmak üzere müstakillen dükkân küşâd edip ol vechile esnâfımızın ihtilâline bâdi olduğuna binâen medîne-i Eyüb’de Balçık iskelesi nâm mahalde küşâd eylediği dükkân bâ-i‘lâm sedd u bend olmuşken mezbûr es-Seyyid Ali yine itâ‘at etmeyip bizi rencîde ve ta‘cîzden hâli olmamağla suâl olunup tenbîh olunmak murâdımızdır deyü takrîrine mutâbık bir kıt‘a i‘lâm ibrâzıyla teşekkî etmeleriyle fi-mâ ba‘d usta olmadıkça müceddeden dükkân küşâd etmeyip ber-mantûk-ı i‘lâm-ı meskûr hareket etmek üzere merkūm es-Seyyid Ali’ye tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-23 min Ra sene [1]217