İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 355 Hüküm no: 408 Orijinal metin no: [58b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haffâf Mahmud Ağa b. Ebîbekir’in haffaf dükkânını, kira akdini feshettiği için Âmine bt. Osman’a iade etmesi gerektiği Haffâf dükkânı tahliyye Ma‘rûz Bâ‘isetü’l-i‘lâm mu‘arrefetü’z-zât Hammâmî Âmine bt. el-Hâc Osman nâm Hatun meclis-i şer‘-i münîrde Haffâf el-Hâc Mahmud Ağa b. Ebûbekir nâm kimesne mahzarında İslâmbol’da yağlıkçı çarşısında Nerdübanlı Câmi‘i karşısında vâki‘ nısf hissesine bi’l-îcâreteyn mutasarrıfe olduğum bir bâb ma‘lûmü’l-hudûd haffâf dükkânı derûnunda mevcûde beyne’l-esnâf gedik tâ‘bir olunur yedimde mülk ve hakkım olan âlât-ı lâzıme-i ma‘lûme merkūm el-Hâc Mahmud Ağa’nın müşâhereten taht-ı îcâresinde olup lâkin ben târih-i i‘lâm-ı şehrî olan Rebî‘ülevvel gāyetinden fesh-i akd-i îcâr etmemle âlât-ı mezkûreyi şehr-i merkūm gāyetinde ba‘de’t-tahliyye bana teslîme merkūm el-Hâc Mahmud Ağa’ya tenbîh olunmak murâdımdır dedikde ol dahi cevâbında müdde‘iye-i mezbûre ber-vech-i muharrer müdde‘âsını bi-tamâmihî ikrâr u i‘tirâf etmeğin mûcebiyle âlât-ı mezkûreyi ba‘de’t-tahliyye gāyet-i şehr-i merkūmda müdde‘iye Âmine Hatun’a teslîme merkūm el-Hâc Mahmud Ağa’ya tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-28 min Ra sene 1217