İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 356 Hüküm no: 410 Orijinal metin no: [59a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karındaş oğlu Bedros’un, İngiltere müstemenleriden Kostanadino Markopolo’ya tülbent borcunu ödemediği Tülbentçi Ma‘rûz İngiltere elçisinin işbu memhûr takrîrinde mastûrü’l-ism İngiltere müste’menlerinden Kostandino Markopolo nâm müste’men meclis-i şer‘-i enverde takrîr-i kelâm edip ben bundan akdem tülbentçi esnâfından karındaş oğlu Bedrosâ malımdan yüz on dokuz top beyaz tülbendimi semen-i ma‘lûme nesî’eten? ba‘de’l-bey‘ ve’t-teslîm henüz semen-i mezkûru kable’l-edâ mersûm Bedros zimmî gaybet-i münkatı‘a ile gāib olup lâkin ber-vech-i muharrer gāib-i mersûma bey‘ ve teslîm eylediğim tülbent gāib-i mersûmun malını hıfza kıbel-i şer‘den kayyım nasb olunan tülbentçiler kethüdâsı Abdullah Ağa’nın yedinde mevcûd olmağla zikr olunan tülbent bana teslîm olunması murâdımdır deyü istid‘â ve sâdır olan fermân-ı âlîlerine imtisâlen madde-i merkūmeyi li-ecli’t-tahkīk taraf-ı dâ‘îlerinden irsâl olunan Kâtib Süleyman Efendi tülbentçi esnâfının lonca odasına varıp gāib-i mersûmun mâlı olmak üzere kıbel-i şer‘den kayyım olan mezbûr Abdullah Ağa’nın ma‘rifet-i şer‘le yedinde olan tülbentlere müste’men-i mersûm lede’l-mu‘âyene müste’men-i mersûmun nişanıyla ancak otuz bir top tülbent mevcûd olduğunu meclis-i şer‘a inhâ edip lâkin zikr olunan tülbentleri müste’men-i mersûma bey‘ ve temlîk eylediğini mu‘terif iken ber-vech-i muharrer bey‘i fesh ile mebî‘i şer‘an mütâlebeye kādir olmayıp ancak gāib-i mersûma hîn-i zaferde semeni mütâlebesi iktizâ eylediğinden mâ‘adâ bu makūle gāib veyâhud kıbel-i şer‘den nasb olunan kayyımı ile muhâsama ve hâli mütebeyyin olmadan malı dâyînleri beyninde taksîme dahi mesâğ-ı şer‘î olmadığı huzûr-ı âlîlerine i‘lâm olundu. Fî-29 min Ra sene 1217