İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 357 Hüküm no: 411 Orijinal metin no: [59a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tülbentçi esnafının Rusya tüccarına olan borcunun taksitlendirilerek tecil edildiği 22.895 guruş tülbentçi esnâfının Rusya tüccârına deynleri te’cîl i‘lâmı Ma‘rûz Rusya elçisinin işbu memhûr arzuhâlinde mezkûrü’l-ism Rusya diyârı müste’menlerinden Balandıra v. Dimitri nâm müste’men tercümânı vekîli Hanparsun ile Yani v. Marko hâzır olduğu hâlde meclis-i şer‘-i enverde Tülbentçi Kapril v. Mardros ve Takfur v. Ohannes ve Avadis v. Panayot ve Karabet v. () nâm zimmîler muvâcehelerinde mersûm Kapril zimmî zimmetinde bin iki yüz on altı senesinde duhûl eden Mart târihiyle muvarrah bir kıt‘a temessük nâtık olduğu üzere tülbent semeninden üç bin beş yüz altmış iki buçuk guruş ve sene-i mezbûre Rebî‘ülâhirinin üçüncü günü târihiyle muvarrah diğer bir kıt‘a temessük mantûkunca kezâlik tülbent semeninden bin dokuz yüz elli guruş deyne târih-i mezbûr ile muvarrah âhar bir kıt‘a temessük ile yedi yüz kırk guruş ki cem‘an üç kıt‘a temessük ile tülbent semeninden altı bin iki yüz elli iki buçuk guruş alacak hakkım olmağla meblağ-ı mecmû‘-ı mezkûru mersûm Kapril zimmîden ve mersûmûn Kapril ve Avadis ve Takfur zimmîler zimmetlerinde her biri âharın zimmetine lâzım gelen mikdâra kefîl ve zâmin olmak üzere üç kıt‘a temessük ile alacağım olan dört bin yüz guruşu ve diğer bin iki yüz on altı senesi Rebî‘ülâhir târihiyle muvarrah bir kıt‘a temessük ile kezâlik mersûmûn Kapril ve Avadis ve Takfur zimmîler her biri âharın zimmetine kefil ve zâmin olmak üzere tülbent semeninden zimmetlerinde alacağım olan altı bin dört yüz seksen dokuz buçuk guruşu asâlet ve kefâletlerine binâen mersûmûn Kapril ve Avadis ve Takfur zimmîlerden ve üç kıt‘a temessük mantûkunca mersûm Karabet zimmî zimmetinde dahi tülbent semeninden alacağım olan altı bin elli üç guruşu mersûm Karabet zimmîden hâlâ taleb ederim deyü takrîrime mutâbık Ermeniyyü’l-ibâre on kıt‘a temessük ibrazıyla da‘vâ eylediğimde onlar dahi cevâblarında bâlâda bast u beyân olunan cem‘an cihet-i mezkûreden yirmi iki bin sekiz yüz doksan beş guruş bana sahîhan deynleri olduğunu her biri kat‘iyyen ikrâr u i‘tirâf ve ber-vech-i âtî te’cîle tâlib olmalarıyla ben dahi müstakillen mersûm Kapril zimmî zimmetinde üç kıt‘a temessük ile alacağım olan meblağ-ı mezbûr altı bin iki yüz elli iki buçuk guruşun yedi yüz kırk guruşunu ber-vech-i peşin ve üç bin beş yüz altmış iki buçuk guruşunu târih-i i‘lâm-ı şehr-i Rebî‘ülâhir gurresinden doksan bir gün mürûrunda ve bin dokuz yüz elli guruşunu dahi yine şehr-i merkūm gurresinden altmış bir gün mürûrunda mesfûr Kapril zimmî bana edâ etmek üzere te’cîl ve mersûmûn Kapril ve Avadis ve Takfur zimmîler zimmetlerinde üç kıt‘a temessük ile asâlet ve kefâletlerine binâen alacağım olan meblağ-ı mezbûr dört bin yüz guruşun yine şehr-i merkūm gurresinden beher haftada beşer yüz guruşdan sekiz hafta iki gün mürûrunda ve diğer bir kıt‘a temessük nâtık olduğu üzere kezâlik asâlet ve kefâletlerine binâen zimmetlerinde alacağım olan meblağ-ı mezbûr altı bin dört yüz seksen dokuz buçuk guruşu yine şehr-i merkūm gurresinden i‘tibâr ile beher iki ay mürûrunda bin beşer yüz guruşdan sekiz ay on gün tamamında tamamen mersûmûn Kapril ve Avadis ve Takfur zimmîlerden her biri asâlet ve kefâletlerine binâen bana edâ etmek üzere te’cîl ve ve taksît eylediğimde onlardan her biri dahi kabûl ve mersûm Kapril zimmî müstakillen deyni olan altı bin iki yüz elli iki buçuk guruşu asâletine binâen mesfûrûn Avadis ve Takfur ve Kapril zimmîler dahi üç kıt‘a temessük ile deynleri olan meblağ-ı mezbûr dört bin yüz guruşu ve diğer temessük ile deynleri olan meblağ-ı mezbûr altı bin dört yüz seksen dokuz buçuk guruşu asâlet ve kefâletlerine binâen ber-vech-i muharrer müeccilen bana edâya her biri ba‘de’t-ta‘ahhüd mersûm Karabet zimmî zimmetinde dahi üç kıt‘a temessük ile alacağım olan meblağ-ı mezbûr altı bin elli üç guruşu işbu hâzır-ı mersûm Yani zimmî mersûm Karabet zimmîden kabz etmek üzere mersûm Karabet zimmîyı deyn-i mezkûruyla üçümüz bir meclisde iken havâle-i mutlaka-yı sahîha ile havâle eylediğimde her birimiz havâle-i mezkûreyi ba‘de’l-kabûl hâzır-ı mersûm Yani zimmî dahi mersûm Karabet zimmî zimmetinde cihet-i havâle-i mezkûreden alacağı olan meblağ-ı mezkûr altı bin elli üç guruşu târih-i i‘lâm senesi Şa‘bâni’l-mu‘azzamı gurresinden i‘tibâr ile beher şehr beşer yüz guruşdan [59b] on iki ay üç gün mürûrunda mersûm Karabet zimmî kendiye edâ etmek üzere hâzır-ı mersûm Yani dahi te’cîl ve taksît eylediğinde mersûm Karabet zimmî dahi kabûl ve ber-vech-i muharrer edâya ba‘de’t-ta‘ahhüd mersûm Karabet zimmî deyn-i mezkûru olan altı bin elli üç guruş mukābelesinde İslâmbol’da astarcılar Hânı karşısında kâin bir bâb ma‘lûmü’l-hudûd yemenici dükkânı derûnunda mevcûde beyne’l-esnâf gedik tâ‘bir olunur bir minder ve yirmi bohça ve sâir âlât-ı lâzıme-i ma‘lûmesini mersûm Yani zimmîye bi-tarîkı’l-istiğlâl bey‘ ve teslîm eylediğinde ol dahi ahz u kabz eyledi deyü ikrâr u i‘tirâfını mersûmûn Kapril ve Takfur ve Avadis ve Karabet ve hâzır-ı mersûm Yani zimmîden her biri tasdîk eyledikleri huzûr-ı âlîlerine i‘lâm olundu. Fî-gurre min Rebî‘ülâhir sene [1]217