İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 359 Hüküm no: 412 Orijinal metin no: [59b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cüllah esnafından Seyyid Osman Usta’nın esnafa itâat edeceğini ve nizama uyacağını taahhüt etmesi Cüllâh esnâfına dâir ta‘ahhüd i‘lâmı Ma‘rûz Âsitâne-i aliyye’de vâki‘ cüllâh tâifesinin kethüdâsı Çalık Mehmed Ağa ve yiğitbaşı İbrahim Ağa ve müsinn-i ihtiyârlarından Yakub Ağa ve el-Hâc Süleyman ve İbrahim ve Mehmed Ağa ve Abdullah ve Ali ve Süleyman ve Mehmed ve Mustafa ve Ahmed ve Osman ve İsmail ve diğer Ali ve diğer Mehmed ve âhar Ali ve âhar Mehmed ve Abdurrahman ve diğer Osman vesâir mazbûtü’l-esâmî kimesneler meclis-i şer‘-i enverde es-Seyyid Osman b. Hasan mahzarında mezbûr es-Seyyid Osman ve usta esnâfımızdan olup lâkin kalb ve redî iş işleyip bi’d-defa‘ât kendiye tenbîh olundukda kethüdâ ve ihtiyârlarımıza itâ‘at etmeyip ve hilâf-ı şürût-ı nizâm hareket etmekle esnâf-ı mezkûreden tard ve ihrâc olunması murâdımızdır deyü iştikâ ettiklerinde merkūm es-Seyyid Osman Usta istintak olundukda cevâbında inkârından mâ‘adâ fîmâ ba‘d kalb ve redî iş işlemeyip ve esnâf-ı mezkûreye itâ‘at ve inkıyâd ve şürût-ı nizâmları üzere harekete ta‘ahhüd ve hilâfı hareket eder ise esnâf-ı mezkûreden tard ve ihrâc-birle tedîb olunmasına râzı oldukda esnâf-ı mezkûre dahi şikâyetlerini tehîr eyledikleri İslâmbol Mahkemesi’nden huzûr-ı âlîlerine i‘lâm olundu. Fî-3 Rebî‘ülâhir sene [1]217