İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 359 Hüküm no: 413 Orijinal metin no: [59b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Bey’in, Fincancı Zakar v. Asvador’a borcunu ödemesi gerektiği 4.003 guruşu edâya tenbîh Ma‘rûz Bahr-i sefîd’de vâki‘ Kuşadası’nda ticâret ile mukīm iken bin iki yüz on yedi senesi Muharreminin selhi günü bilâ-vâris ma‘rûf ve ma‘rûfe hâlik olan Markar v. Bedros v. Hristo nâm zimmînin ber-vech-i âtî dâyîni Fincancı Zakar v. Asvador nâm zimmî meclis-i şer‘-i münîrde ada-i mezkûrede hâlâ gümrük emini olup bu makūle bilâ-vâris-i ma‘rûf ve ma‘rûfe hâlik olanların terekelerini bâ-fermân-ı âlî kabza me’mûr olmağla tereke-i hâlik-i mesfûre bi’l-emâne vaz‘-ı yedi mütehakkık olup husûmeti kıbel-i şer‘den re’y olunan Ahmed Bey mahzarında hâlik-i mersûm Markar v. Bedros v. Hristo zimmî zimmetinde hayatında bin iki yüz on altı senesi Cemâziyelâhiresi gurresinde İstanbul’da kazgancılar başında fincancı mağazasında malımdan ve yedimden iştirâ ve kabz eylediği ma‘lûmü’l-aded toynak ve billur ve fincan semeninden sekiz bin iki yüz on yedi guruş alacağım olup hatta hâlik-i mesfûr Markar zimmî hayatında târih-i mezbûrda meblağ-ı mezbûr sekiz bin iki yüz on yedi guruş ol cihetden zimmetinde sahîhan bana deyni olduğunu ikrâr ve yedime mu‘anven ve mersûm işbu bir kıt‘a deyn temessükünü verip kablel edâ ada-i mezkûrede bilâ-vâris-i mağrûf ve mağrûfe hâlik oldukda merkūm Ahmed Bey ma‘rifet-i şer‘ ile tahrîr olunan terekesi esmânından ba‘de ihrâci’l-mesârifi’l-lâzıme sahhe’l-bâkī ber-mûceb-i defter-i kassâm dört bin üç guruşu bi’l-emâne kabz etmekle meblağ-ı mezbûr dört bin üç guruşu meblağ-ı mezbûrun ol mikdârına takāsan emin-i mezbûr Ahmed Bey’den hâlâ taleb ederim deyü da‘vâ ettikde emin-i merkūm cevâbında ber-mûceb-i defter-i kassâm dört bin üç guruş tereke-i hâlik-i mersûma bi’l-emâne vaz‘-ı yedini ikrâr mâ‘adâyı inkâr etmekle müdde‘î-i mersûm ber-vech-i muharrer müdde‘âsını lede’t-tezkiye adl ve makbûlü’ş-şehâde idükleri ihbâr olunan Mustafa Efendi b. İbrahim ve Molla Mustafa b. el-Hâc Mustafa ve Mehmed Emin b. Hasan şehâdetleriyle bi’l-muvâcehe ber-nehc-i şer‘î ba‘de’l-isbât ve’l-halef mûcebiyle meblağ-ı mezbûr dört bin üç guruşu hâlik-i mesfûrun deyn-i müsbeti olan meblağ-ı mezkûr sekiz bin iki yüz on yedi guruşun ol mikdârına takāsan müdde‘î-i mersûm Zakar zimmîye edâ ve teslîme emin-i merkūm Ahmed Bey’e tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-9 min Rebî‘ülâhire sene [1]217