İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 360 Hüküm no: 414 Orijinal metin no: [59b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gavrail v. Dimitri’nin, kira akdini feshetmesi sebebiyle kiracısı Toma v. Dimitri’nin menzili tahliyye etmesi gerektiği Fesh-i îcâr ve menzilden ihrâc Ma‘rûz Arzuhâl eden Gavrail v. Dimitri zimmî meclis-i şer‘-i enverde derûn-ı arzuhâlde mastûrü’l-ism Toma v. Dimitri zimmî muvâcehesinde İslâmbol’da Kumkapı kurbünde Tavâşî Süleyman Ağa Mahallesi’nde kâin bi’l-îcâreteyn taht-ı tasarrufunda olan ma‘lûmü’l-hudûd bir bâb menzilimde mersûm Toma zimmî aded-i şuhûr beyân olunmaksızın müşâhereten müstecirim iken şehr-i sâbık Rebî‘ülevvel gāyetinde fesh-i akd-i îcâr etmişken mersûm Toma zimmî menzil-i mezkûru teslîm etmeyip fuzûlî zabt etmekle suâl olunup menzil-i mezkûru ba‘de’t-tahliyye teslîme mersûme Toma zimmîye tenbîh olunmak murâdımdır deyü da‘vâ ettikde ol dahi cevâbında kaziyye minvâl-i meşrûh üzere olduğunu bi-tamâmihâ ikrâr u i‘tirâf edip lâkin ben menzil-i mezbûrda otuz sene müddetden beri müşâhereten müstecir olmamla yine bana îcârına mesfûr Gavrail zimmîye cebr olunmak murâdımdır deyü îrad eylediği a‘zâr-ı vâhiyesine [i‘tibâr] olmamağla mûcebince menzil-i mezkûru tahliyye ve mersûm Dimitri zimmîye teslîme mersûme Toma zimmîye tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-13 min R sene [1]217