İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 361 Hüküm no: 416 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukadâr Osman b. Abdullah’ın Yorgaki, Oskoli ve Mihal aleyhine açtığı hırsızlık davasının reddedildiği Serika nizâ‘ı mu‘âzaradan men‘ Ma‘rûz Sâhib-i arzuhâl Çukadâr Osman b. Abdullah meclis-i şer‘-i enverde medîne-i Eyüb toprağında Topçular nâm mahalde vâki‘ nalbant Hânı demekle ma‘rûf hânın hâncıları derûn-ı arzuhâlde mastûrü’l-ism Yorgaki v. Manol ve Oskoli v. Tanaş ve Mihal v. Tanaş muvâcehelerinde ben hân-ı mezkûrda müsteciren sâkin olmamla hân-ı mezkûrun tabaka-i ulyâsında vâki‘ odamda mevcûd mâlım olan mecmû‘u yüz elli guruş kıymetli bir simli tüfenk ve bir çift simli piştov ve iki çift sade piştov sirka olunmağla mücerred mersûmûn Yorgaki ve Oskoli ve Mihal hân-ı mezkûrun hâncıları olduğuna binâen zikr olunan eşyâmı bulsunlar yâhud sâriki her kim ise bulup bana teslîm eylesinler deyü takrîr-i meşrûhu üzere tasaddî eylediği da‘vâsı meşrû‘a olmamağla kelâmına iltifât olunmayıp mûcebiyle mesfûrûn Yorgaki ve Oskoli ve Mihal zimmîlere bî-vech-i şer‘î mu‘ârazadan men‘ olunduğu İslâmbol Mahkemesi’nden huzûr-ı âlîlerine i‘lâm olundu. Fî-18 min-Rebî‘ülâhir sene [1]217