İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 362 Hüküm no: 417 Orijinal metin no: [60a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Salih’in ortağı İsmail Ağa b. İbrahim aleyhine açtığı alacak davasının reddedildiği 3.000 guruş mal-ı şirket mu‘ârazadan men‘ Ma‘rûz Galata Yağkapanı tüccârından sâhib-i arzuhâl Mustafa b. Salih nâm kimesne meclis-i şer‘-i enverde kapan-ı dakīk tüccârından derûn-ı arzuhâlde mezkûrü’l-ism İsmail Ağa b. İbrahim muvâcehesinde İbrail’de sâkin el-Hâc Abdullah ile ınânen şerîkler iken mezbûr el-Hâc Abdullah fesh-i akd-i şirket-birle benimle beynimizde cereyân eden ahz u i‘tânın hesâbını rü’yet ve lede’l-muhâsebe yed ve zimmetimde zuhûr eden hakkını kabza tarafından kabûlüne mevkūfe merkūm İsmail Ağa’yı tevkîl ol dahi vekâlet-i mezbûreyi vech-i şer‘î üzere muvâcehemde ba‘de’l-isbât benimle rü’yet-i muhâsebe ve yedimde şerîkim mezbûrun zuhûr eden mâlını bi’l-vekâle kabz ettikden sonra şerîkim mezbûr el-Hâc Abdullah vefât edip lâkin şerîkim mezbûrun ol tarafda hayr? fâidesinden cem‘ eylediği altı bin guruşdan benim hisseme iktizâ eden üç bin guruş şerîkim mezbûrda kalmağla mücerred merkūm İsmail Ağa vech-i meşrûh üzere benimle rü’yet-i muhâsebeye müteveffâ-i mezbûrun hayatında vekîl olmağla meblağ-ı mezkûr üç bin guruşu bana mâlından vermek üzere merkūm İsmail Ağa’ya cebr olunsun deyü takrîr-i meşrûhu üzere tasaddî eylediği da‘vâsında merkūm İsmail Ağa’ya hasm-ı şer‘î olmamağla suâl dahi teveccüh etmeyip mûcebince da‘vâ-yı mezkûresiyle merkūm İsmail Ağa’ya bî-vech mu‘ârazadan men‘ olunduğu huzûr-ı âlîlerine i‘lâm olundu. Fî-18 min-Rebî‘ülâhire sene [1]217