İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 362 Hüküm no: 418 Orijinal metin no: [60a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar Çanlı cami-i şerifinin kapısı üzerindeki tahta kurşunu çalan Kara Mustafa oğlu Hasan’nın elinin kesilmeyerek tazirle cezalandırılması gerektiği Kurşun serikası i‘lâmı Ma‘rûz Sâdır olan fermân-ı âlîşâna imtisâlen medîne-i Üsküdar nâibi kullarının işbu bir kıt‘a i‘lâmı nâtık olduğu üzere medîne-i mezbûrede vâki‘ Çinili câmi‘-i şerîfinin kapısı üzerinden bir tahta kurşunu sirka eylediğini tâyi‘an ikrâr eden derûn-ı i‘lâmda mezkûrü’l-ism Kara Mustafa oğlu Hasan evvelâ Çarşamba günü dîvân-ı âsafânelerinde ve ba‘dehû du‘âhânemizde ma‘kūd meclis-i şer‘-i enverde bi’d-defa‘ât istintak olundukda eğerçe ben kurşun sirkası için câmi‘-i mezbûrun kapısına çıkıp henüz kurşunu ahz etmeksizin medîne-i Üsküdar ustası kullarının neferâtı beni ahz ve yedime bir tahta kurşun verip ba‘dehû medîne-i mezkûre mahallesinde ihzâr olunup bu vechile takrîr etmişdim deyü bu def‘a bu mertebe takrîri ile mukaddemâ olan ikrârından rücû‘ etmiş olup bu sûretde ikrâr-ı sirkadan rücû‘ sahîh olduğu ve sirka eylediği câmi‘ metâ‘ı olmağla kat-ı yed lâzım gelmediği kütüb-i fetâvâ-yı mu‘tebereden Dürrü’l-Muhtâr’da “ve sahh-ı rücû‘uhu an ikrâri bihâ” ve Hidaye’de “Ve lâ yüharriz bi-bâbi’l-mescidi mâ fîhi hattâ lâ yucîbu’l-kat‘i bi-sirkıhî metâ‘ihî” deyü mastûr olan meselelerden müstebân olmağla merkūm Hasan’a ancak tağzîr lâzım gelmekle merkūm Hasan’ın iktizâ eden tağzîri husûsu re’y-i âsafânelerine menût idüğü İslâmbol Mahkemesi’nden huzûr-ı âlîlerine i‘lâm olundu. Fî-19 min-Rebî‘ülâhire sene [1]217