İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 366 Hüküm no: 423 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evlad-ı vâkıftan olması hasebiyle Köse Mustafa Efendi vakfının tevliyetinin Rukiye bt. Ali’ye ait olduğu Tevcîh-i tevliyet Ma‘rûz Sâhibe-i arzuhâl mu‘arrefetü’z-zât Rukiye bt. Ali nâm Hatun Çarşamba günü arz odasında huzûr-ı hazret-i âsafânelerinde ma‘kūd meclis-i şer‘-i enverde nezâret-i dâ‘îlerinde âsûde evkāfdan merhûm defterdâr Köse Mustafa Efendi der-mahalle-i Güngörmez Vakfı’nın hâmiş-i arzuhâlde mastûr derkenâr nâtık olduğu üzere hâlâ mütevellîsi olan es-Seyyid Mehmed Azîz Efendi b. İbrahim Efendi mahzarında tevliyet-i mezkûre vâkıf-ı merhûmun utekāsına ve evlâd-ı utekāsına meşrûta olup şart-ı vâkıf üzere vakf-ı mezbûra evlâd-ı evlâd-ı utekādan es-Seyyid Ali Halîfe’nin üzerinde iken fevt oldukda ben evlâd-ı evlâd-ı utekādan olup nevbet-i tasarruf-ı tevliyet benim iken mezbûr es-Seyyid Mehmed Azîz Efendi’nin babası merkūm kendi üzerine tevcîh etdirip fevt oldukda onun dahi mahlûlünden kendiye tevcîh etdirdip el-yevm üzerinde olup bana gadr-ı küllî olmağla tevliyet-i mezkûre merkūm es-Seyyid Mehmed Azîz Efendi’nin ref‘inden şart-ı vâkıf üzere bana tevcîh olunmak murâdımdır deyü da‘vâ ettikde ol dahi cevâbında tevliyet-i mezkûre bin yüz otuz beş târihinden beri bilâ-meşrûta zabt ve tasarruf oluna gelmişdir deyü ber-vech-i muharrer müdde‘âsını inkâr edip ol vechile beynlerinde ba‘de’l-münâza‘a re’y-i âsafâneleri üzere mezbûr es-Seyyid Mehmed Aziz Efendi hüsn-i rızâsıyla tevliyet-i mezkûreyi arz odasında merkūme Rukiye Hatun’a ferağ ve kasr-ı yed eylediğinde ol dahi ba‘de’t-tefevvüz tevliyet-i mezkûre fâriğ-i mezbûrun ferağ ve kasr-ı yedinden mezbûre Rukıyye Hatun’a tevcîh ve yedine berât-ı şerîf-i âlişân inâyet ve ihsân buyrulmasını istirhâm eylediği İslâmbol Mahkemesi’nden huzûr-ı âlîlerine i‘lâm olundu. Fî-26 min-Rebî‘ülâhire sene [1]217