İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 367 Hüküm no: 424 Orijinal metin no: [61a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çilingir esnafının ahvali mechül kişilere anahtar ve kilit yapmamaları gerektiği Çilingir esnâfının nizâm-ı i‘lâmı Ma‘rûz Dârü’s-saltanatü’l-aliyyede vâki‘ çilingir esnâfı nâ-halef ve mechûlü’l-ahvâl kimesnelere miftâh inşâ ve kilid füruht eylemeleri memnû‘ iken adem-i ihtimâmlarına aralık aralık sârikler peydâ ve ibâdullâh rahnedâr ve sârik makūleleri fürce-yâb olup ibâdullâhın her hâlde emn ve rahatları aksâ-yı me’reb-i şâhâne olduğundan fîmâ ba‘d çilingir esnâfı hâne sâhibi ve handa bîkâr odaları hâncıları ve dükkân ashâbı olmayan mechûlü’l-ahvâl kimesnelere miftâh yapmamak ve yaptıkları miftâh ile ne âhar kapı ve dolabı açmamak ve kapı ve dolaplarda müte‘addid miftâh inşa olunmamak ve miftâh yaptırılmak için çilingirlere geldikde hâne ve dükkân sâhibi ve hâncı değil ise kat‘îce cevâb verip def‘ etmek ve çilingir esnâfı dahi beş paralık miftâhı iki üç katına yapmak ve hilâf-ı emr-i âlî hareket etmek lâzım gelir ise tebdîller ma‘rifetleriyle ahz ve bilâ-emân tertîb-i cezâ kılınmak husûslarına irâde-i aliyye taalluk etmekten nâşî Âsitâne-i sa‘âdette kâin hânlar hâncıları vesâir esnâf kethüdâları ve söz sâhiblerini ve çilingir esnâfının kethüdâ ve ustalarını huzûrunuza celb ve mazmûn-ı fermân-ı âlî gûş-ı hûşlarına gereği gibi ilkā ederek bundan sonra gerek hâne ve gerek dükkân ve hân ve bîkâr odalarında her kim miftâh ve kilid yaptırmak lâzım gelirse hâne ve dükkân hâncılar ma‘rifetleriyle yaptırılmak ve mechûlü’l-ahvâl kimesneler miftâh ve kilid yaptırmak için çilingirlere geldikde ma‘lûmları olmayan kimesneye miftâh yapmak ve hilâf-ı emr-i âlî hareket etmek lâzım gelir ise kangı çilingir yapmış ise der-akab ahz ve bilâ-emân tertîb-i cezâ kılınacağı emr-i mukarrer olmağla ona göre amel ve hareket eylemelerini dahi tekîd ederek ta‘ahhüd ve nizâm-ı kavîye rabt ile işbu nizâm düstûrü’l-amel tutulmak üzere Başmuhâsebe’ye kaydolunmak için ta‘ahhüd edenlerin isim ve şöhretleriyle huzûrumuza i‘lâma mübâderet eyleyesin deyü bu dâ‘îlerine ve izzetlü yeniçeri ağası kullarına hitaben beyaz üzerine mufassalan sâdır olan fermân-ı âlîlerine imtisâlen çilingirler kethüdâsı es-Seyyid el-Hâc İsmail Ağa ve çilingir esnâfından yiğitbaşı Artin ve Tahtakaleli Melbos v. Haçador ve Yenicami‘inde Varteres ve Balkapanında Acı Avanes ve Agob ve yine Yenicâmi‘inde Papil ve yine Balkapanlı Hüdaverdi ve Artin ve Repayil vesâir mazbûtü’l-esâmî çilingir ve hânlar hâncıları ve odabaşıları ve bi’l-cümle esnâf kethüdâları ve söz sâhibleri meclis-i şer‘a ihzâr ve ağa-yı mûmâ-ileyh hâzır olduğu hâlde işbu fermân-ı celîlü’ş-şân muvâcehelerinde feth ve kırâet ve mazmûn-ı itâ‘at-makrûnu gûş-ı hûşlarına gereği gibi ilkā ve telkīn olundukda onlardan her biri dahi sem‘an ve tâ‘aten merâsimini ba‘de’l-edâ evvelâ Âsitâne-i aliyyede vâki‘ hânlar hâncıları ve odabaşıları vesâir esnâf kethüdâları ve söz sâhibleri hânlarında müsteciren sâkinler ve ashâb-ı dekâkînden biri ma‘rifetleri munzam olmadıkça miftâh yaptırmamak ve kapı ve dükkân ve dolaplarını açtırmamak üzere ta‘ahhüd ve sâniyen çilingirler kethüdâsı ve bi’l-cümle esnâfı hâne ve hân ve dükkânların ve dolab ve kapılara üçer beşer miftâh ve ashâbı ma‘lûm olmayan mechûlü’l-ahvâl kimesne miftâh yapmamak ve yaptıkları miftâh âhar kapı ve dolabı açmamak ve miftâh yaptırmak için gelen kimesneler hâne ve dükkân sâhibi ve hâncı değiller ise kat‘îce cevap vermek ve beş paralık miftâhı iki ve üç katına yapmayıp semen-i misline yapmak üzere her biri ta‘ahhüd edip bu vechile nizâm-ı kavîye rabt olunmağla işbu nizâm ilâ-mâşâallâhû te‘âlâ düstûrü’l-amel tutulmak üzere Başmuhâsebe’ye kayd buyrulmak husûsu re’y-i âsafânelerine menût idüğü İslâmbol Mahkemesi’nden huzûr-ı âlîlerine i‘lâm olundu. Fî-gurre-i Cemâziyelevvel sene [1]217