İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 368 Hüküm no: 425 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nesim v. Yasef’in, Hasan b. Ali’ye olan borcunu ödemesi gerektiği 2.000 guruş hüküm Ma‘rûz Sâhib-i arzuhâl Hasan b. Ali Çarşamba günü arz odasında huzûr-ı hazret-i âsafânelerinde ma‘kūd meclis-i şer‘-i enverde derûn-ı arzuhâlde mastûrü’l-ism Nesim v. Yasef muvâcehesinde mersûm Nesim Yahûdi târih-i i‘lâmdan sekiz ay mukaddem beher kıyyesi kırkar paraya semen tesmiyesiyle yedimden ve malımdan iştirâ ve kabz eylediği iki bin vakıyye duhân semeninden iki bin guruş zimmetinde alacağım olup hatta mersûm Nesim Yahûdi kirâren ve mirâren ber-vech-i muharrer malımdan beher kıyyesi kırkar paraya iki bin vakıyye duhân iştirâ ve kabz ve semen-i merkūm zimmetinde deyni olduğunu ikrâr dahi etmişdi meblağ-ı mezbûr iki bin guruşu mersûm Nesim Yahûdi’den hâlâ taleb ederim deyü da‘vâ ettikde ol dahi cevâbında merkūm Hasan zikr olunan iki bin vakıyye duhânını gāib ani’l-meclis Kamal Yahudî’ye benim vekâletimle bey‘ ve teslîm etmişdi deyü ber-vech-i muharrer ol mikdâr duhânı iştirâsını inkâr etmekle müdde‘î-i merkūm ber-vech-i muharrer müdde‘âsını lede’t-tezkiye adl ve makbûlü’ş-şehâde idükleri ihbâr olunan Tütüncü Tatar Mustafa b. Hasan ve Esirci Molla Ali b. el-Hâc Abdullah nâm kimesnelerin arz odasında vech-i vecih-i şer‘î üzere şehâdetleriyle bi’l-muvâcehe ber-nehc-i şer‘î isbât etmeğin mûcebiyle meblağ-ı mezbûr iki bin guruşu müdde‘î-i merkūm Hasan’a edâ ve teslîme mersûm Nesim Yahûdi’ye tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-26 min-Rebî‘ülâhire sene [1]217