İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 369 Hüküm no: 426 Orijinal metin no: [61b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin-Bey b.Mahmud Bey’in, Haseki Ali Ağa’daki alacağına Tuzcu Mehmed Ağa b. Şaban’ın kefil olmadığı Mazbatadan derkenâr Ma‘rûz Sâhib-i arzuhâl Tuzcu Mehmed Ağa b. Şaban meclis-i şer‘-i enverde hâcegân-ı dîvân-ı hümâyûndan derûn-ı arzuhâlde mezkûrü’l-ism es-Seyyid Mehmed Emin-Bey b. es-Seyyid Mahmud Bey muvâcehesinde bin iki yüz sekiz senesi Saferi’l-hayrının on beşinci günü gāib ani’l-meclis Haseki Ali Ağa nâm kimesnenin ancak nefsine kefîl olmuşken târih-i i‘lâm-ı mezbûrdan altmış gün mürûrunda mezbûr es-Seyyid Mehmed Emin-Bey benim gāib-i mezbûr zimmetinde bedel-i iltizâmdan bâkī bin beş yüz guruş alacağım vardır deyü malımdan bi-gayr hakkın bin beş yüz guruşumu almağla hâlâ istirdâd ederim deyü da‘vâ ettikde ol dahi cevâbında benim gāib-i mezbûr zimmetinde bedel-i iltizâmdan bâkī alacağım olan bin beş yüz guruşa mezbûr Mehmed Ağa kefîl olmağla kefâletine binâen meblağ-ı mezbûr bin beş yüz guruşu merkūm Tuzcu Mehmed Ağa’nın malından ahz etmişdim deyü ber-vech-i muharrer ahzını ikrâr edip bu sûretde bedel-i iltizâma kefâlet sahîh olmağla meblağ-ı mezbûr bin beş yüz guruşun reddi şer‘an lâzım gelip lâkin li-ecli’l-ilzâm merkūm es-Seyyid Mehmed Emin-Bey fetvâ-yı şerîfeye havâle olunup tarefeyn bir dahi zuhûr etmemeleriyle henüz da‘vâlarına faysal verilmediği mazbût olmağın imtisâlen li’l-emri’l-âli sûret-i da‘vâları İstanbul Mahkemesi’nden huzûr-ı âlîlerine i‘lâm olundu. Fî-gurre-i Cemâziyelevvel sene [1]217