İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 370 Hüküm no: 427 Orijinal metin no: [61b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ağnat v. Manol’un, kiracısı Bakkal Nikola v. Mihal’in zimmetini ibrâ ettiği Galata’da bakkāl ibrâsı Ma‘rûz Arzuhâl eden Ağnat v. Manol nâm zimmî meclis-i şer‘-i şerîf-i enverde derûn-ı arzuhâlde mastûrü’l-ism Bakkāl Nikola v. Mihal nâm zimmî muvâcehesinde Galata’da Sultan Bayezid Mahallesi’nde kâin bi’l-îcâreteyn mutasarrıfe olduğum bir bab menzilim arsasında tahmînen on zirâ‘ mahallini ifrâz ve alâmet vaz‘ıyla ba‘de’l-imtiyâz beher şehr altmışar para kirâ ile bundan akdem mesfûr Nikola zimmîye îcâr ol dahi istîcâr ettikden sonra ittisâlinde vâki‘ derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmesine mâlik olduğu İstemad dükkânı demekle arîf bir bâb bakkāl dükkânına idhâl ile bir müddet taht-ı îcâresinde olup el-hâletü hâzihi fesh-i akd-i îcâr eylediğimde ol dahi mahâll-i mezkûru dükkân-ı mezbûrdan ba‘de’l-ifrâz bana teslîm ben dahi kabz ve menzilime idhâl edip mahâll-i mezkûra müte‘allika âmme-i da‘vâdan tarefeynden her birimiz âharın zimmetini kabûlü hâvi ibrâ ve iskāt eyledik deyü ikrâr ve tasdîkleri tescîl İslâmbol Mahkemesi’nden huzûr-ı âlîlerine i‘lâm olundu. Fî-gurre-i Cumâdelûlâ sene [1]217