İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 370 Hüküm no: 428 Orijinal metin no: [61b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mehmed Memiş’in yarım hissesine malik olduğu evini kız kardeşi Nefise Hatun’a kiraladığı Menzil îcârı Ma‘rûz Sâdır olan fermân-ı âlîlerine imtisâlen kıbel-i şer‘den mürsel Kâtib-i sâni Merhabâzâde Mahmud Efendi hâssa mimarı hulefasından Halil ve es-Seyyid Süleyman Edib ile nezâret-i dâ‘îlerinde âsûde evkāfdan Emirler Tekkesinde kâin merhûm Seyfullah Efendi vakfından İstanbul’da Sancaktar Hayreddin Mahallesi’nde vâki‘ bir bâb menzile varıp cerîdede mazbûtü’l-esâmî Müslimîn huzûrlarında akd-i meclis-i şer‘-i kavîm eyledikde sâhibe-i arzuhâl mu‘arrefetü’z-zât Fâtıma bt. Mehmed Memiş meclis-i ma‘kūd-ı mezkûrda derûn-ı arzuhâlde isimleri mezkûr li-ebeveyn karındaşları Mehmed Sadullah ve kezâlik zâtı mu‘arrefe olan Nefise Hatun mahzarlarında vakf-ı mezbûr mütevellîsi eş-Şeyh es-Seyyid Abdüşşükür Efendi b. eş-Şeyh İsmail Efendi hâzır oldukları hâlde işbu derûnunda akd-i meclis olunan menzilin nısfı benim ve rub‘u mezbûr Sadullah’ın ve rub‘u mezbûre Nefise Hatun’un ale’l-iştirâk bi’l-îcâreteyn taht-ı tasarrufumuzda olmağla menzil-i mezkûr ba‘de’l-mu‘âyene bâ-re’y-i mütevellî taksîm ve hisselerimiz ifrâz olunmak murâdımızdır deyü ben da‘vâya tasaddî etmişdim lâkin menzil-i mezkûr taksîm olunduğu sûretde her birimiz hisselerimiz ile intifâ‘ mümkün olmadığını bana tefhîm eylediklerinde ben dahi menzil-i mezkûrda olan nısf hisse-i şâyi‘amı mezbûr Mehmed Sadullah’ın izniyle kız karındaşım mezbûre Nefise Hatun’a aded-i şuhûr beyân olunmaksızın işbu târih-i i‘lâm senesi Cumâdelûlâ [62a] gurresinden beher şehr dörder guruş icâre tesmiyesiyle îcâr ve teslîm eylediğimde ol dahi ber-vech-i muharrer istîcâr ve kabûl ve fîmâ ba‘d menzil-i mezkûrun iktizâ eden ta‘mîrine masrûf her birlerimiz hisselerimize göre edâya ta‘ahhüd eyledik dedikde mukırra-i mezbûre Fâtıma Hatun’u mezbûre Nefise Hatun ile mezbûr Sadullah tasdîk eyledikleri mevlânâ-yı mezbûr mahallinde ketb ve tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eyledikleri İslâmbol Mahkemesi’nden huzûr-ı âlîlerine i‘lâm olundu. Fî-29 min-Rebî‘ülâhire sene [1]217