İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 371 Hüküm no: 430 Orijinal metin no: [62a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İmameci Murad, Abdurrahim ve Mehmed’in, Yako v. Yanto ve Lahor v. Hayem’e olan kehribar borçlarını ödemeleri gerektiği 2.125 guruş kehribâr semeni hüküm Ma‘rûz Bâ‘isü’l-i‘lâm İmâmeci Yako v. Yanto Yahûdi kendi nefsinden asâleten ve şerîki Lahor v. Hayem nâm Yahûdi tarafından dahi husûs-ı âtîde vekîl-i şer‘îsi olmağla vekâleten meclis-i şer‘-i şerîf-i enverde Selânikî Murad b. Abdurrahman ve şerîki Abdurrahim b. Ali ve Mehmed b. Osman nâm kimesne muvâcehelerinde mezbûrûn ve şerîkleri gāib ani’l-beled İbrahim’den her biri âharın zimmetine lâzım gelen mikdâra kefîl ve zâmin olmak üzere mâl-ı şirketimizden işbu sene-i mübâreke Saferi’l-hayrın yirmi ikinci günü iştirâ ve kabz eyledikleri kehribâ imâme semeninden iki bin yüz yirmi beş guruş alacağımız olup hatta merkūmûndan her biri cihet-i mezkûreden meblağ-ı mezbûr iki bin yüz yirmi beş guruş asâlet ve kefâletlerine binâen zimmetlerinde bize deynleri olduğunu ikrâr ve târih-i mezbûr ile muvarrah yedimize işbu bir kıt‘a deyn temessükünü dahi vermeleriyle meblağ-ı mezbûr iki bin yüz yirmi beş guruşu merkūmun Murad ve Abdurrahim ve Mehmed’den asâlet ve kefâletlerine binâen bi’l-asâle ve bi’l-vekâle hâlâ taleb ederim deyü da‘vâ ettikde onlar dahi cevâblarında kaziyye minvâl üzere olduğunu her biri bi-tamâmihâ kat‘iyyen ikrâr u i‘tirâf etmeleriyle mûcebiyle meblağ-ı mezbûr iki bin yüz yirmi beş guruşun asâlet ve kefâletlerine binâen müdde‘î-i asıl ve vekîl-i mersûm Yako Yahûdi’ye edâsıyla merkūmun Murad ve Abdurrahim ve Mehmed ilzâm oldukları İstanbul Mahkemesi’nden huzûr-ı âlîlerine i‘lâm olundu. Fî-7 min-Cumâdelûlâ sene [1]217