İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 372 Hüküm no: 431 Orijinal metin no: [62a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Sâdık b. Musa’nın, yıkıp yeniden yaptığı binâdaki berber dükkânını tekrar Fâtıma bt. İsmail’e kiralayacağı Arabacılar çeşmesi ittisâlinde berber dükkânı îcârı Ma‘rûz Mübârek rikāb-ı kamer-tâb-ı hüsrevânîye arzuhâl takdîm eden mu‘arrefetü’z-zât Fâtıma bt. İsmail nâm Hatun kendi nefsinden asâleten ve sadrı kebîr oğlu Ahmed b. Ali tarafından husûs-ı âtîde vekîl-i şer‘îsi olmağla vekâleten meclis-i şer‘-i enverde berber kethüdâsı Hüseyin ve şeyhleri es-Seyyid Molla Osman ve duacıları Mehmed Sâdık ve yiğitbaşıları es-Seyyid Mehmed ve çavuşları es-Seyyid Ömer hâzirûn oldukları hâlde derûn-ı arzuhâlde mezkûrü’l-ism es-Seyyid el-Hâc Mehmed Sâdık b. Musa mahzarında mezbûr el-Hâc Mehmed Sâdık’ın İstanbul’da Hoca Halil Attâr Mahallesinden arabacılar çeşmesi ittisâlinde kâin bi’l-îcâreteyn mutasarrıf olduğu kadîm berber dükkânı beher şehr üçer guruş kirâ ile benim oğlum müvekkil-i mezbûrun taht-ı îcâremizde ve derûnunda mevcûde beyne’l-esnâf gedik tâ‘bir olunur âhar arzuhâl hâmişinde mastûr ve başmuhâsebe kaleminde mukayyed mu‘teber gedik âlâtı yedimizde mülkümüz olup bu makūle gedik ashâbını ihrâc memnû‘ iken mezbûr es-Seyyid el-Hâc Mehmed Sâdık fesh-i akd-i îcâr-birle dükkân-ı mezbûru hedm ve binâsına şürû‘ eylediği menziline idhâl-birle bize gadr sadedinde olmuşdu el-hâletü hâzihi dükkân-ı mezbûrda mu‘teber gedik olup yedimizde mülkümüz olduğunu mezbûr el-Hâc Mehmed Sâdık tasdîk dükkân-ı mezkûrun hedm eylediği mahallini mevcûd ve matbah ocağı iç yüzünden binâya ta‘ahhüd ve yine beher şehr üçer guruş kirâ-yı kadîmi ile müvekkil-i mezbûr bana îcâr eylediğinde ben dahi ber-vech-i muharrer istîcâr ve îcâre-i mezkûreyi beher şehr bilâ-ezâ ve lâ-cefâ edâya ta‘ahhüd edip bu vechile kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî-2 min-Cumâdelûlâ sene [1]217