İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 373 Hüküm no: 432 Orijinal metin no: [62a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin Ağa b. Mehmed Said’in, tütüncü ve kahveci dükkanı gediğini Ali Beşe b. Mustafa’ya sattığı 1.500 guruşa tütüncü gediği mübâya‘ası Bâ-mühr-i nâib efendi Ma‘rûz İstanbul’da Karaki Mahallesi’nde sâkin Haseki Mehmed Emin Ağa b. Mehmed Said İstanbul Bab mahkemesinde meclis-i şer‘-i münîrde Ali Beşe b. Mustafa nâm kimesne mahzarında akd-i âti’z-zikrin sudûruna değin yedimde mülküm olan Paşakapısı sûkunda kâin bir bâb tütüncü ve kahveci dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmemi tarefeynden îcâb ve kabûlü hâvi şürût-ı müfside ve mübtileden âri bey‘-i bâtt-ı sahîh-i şer‘î ve safka-i vâhide ile mezbûr Ali Beşe’ye bin beş yüz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezkûr bin beş yüz guruşu yedinden tamamen ve kâmilen ahz u kabz edip mebî‘-i mezkûrun tağrîr ve gabnine ve bi’l-cümle husûs-ı mezkûre müte‘allika âmme-i de‘âvîden tarefeynden her birimiz âharın zimmetini ibrâ-yı âmm-ı sahîh-i şer‘î ile ibrâ ve iskāt ve tarefeynden her birimiz ber-vech-i muharrer âharın ibrâsını kabûl eyledik fîmâ ba‘d zikr olunan âlât-ı lâzıme-i ma‘lûmede benim aslan ve kat‘an alâka ve medhalim kalmayıp müşteri-i mezbûr Ali Beşe’nin mülk-i müşterâsı ve hakk-ı sırfı olmuşdur dedikde mezbûr Ali Beşe dahi mukırr-ı mezbûru cemî‘-i kelimâtında ba‘de’t-tasdîk ber-mûceb-i şürût nizâm-ı cedîd gedik-i mezkûrun ma‘den kaleminden kaydı mezbûr Haseki Mehmed Emin Ağa üzerinden ref‘ ve terkīn ve mezbûr Ali Beşe ismine tashîh ve yedine sûret verilmesini istid‘â eylediği huzûr-ı âlîlerine i‘lâm olundu. Fî-7 min-Cumâdelûlâ sene [1]217