İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 374 Hüküm no: 433 Orijinal metin no: [62b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Şamlızâde Hasan’ın, kiracı olduğu tütüncü dükkânını fesh-i akd sebebiyle Hüseyin Efendi b. Hasan’a teslim etmesi gerektiği Havâi berber gediği men‘i Ma‘rûz İstanbul’da Kumkapı kurbünde Çadırcı Ahmed Çelebi Câmi‘-i şerîfinin imâmı sâhib-i arzuhâl Hâfız Hüseyin Efendi b. el-Hâc Hasan meclis-i şer‘-i enverde derûn-ı arzuhâlde mezkûrü’l-ism İbrahim b. Şamlızâde Hasan muvâcehesinde süknâsı câmi‘-i merkūmda imâm olanlara meşrûta olup el-yevm bi’l-meşrûta sâkin olduğum mahalle-i mezbûrede vâki‘ bir bâb menzilden müfrez tahtında kâin bir bâb ma‘lûmü’l-hudûd duhâncı dükkânında hâmiş-i arzuhâlde mastûr derkenâr nâtık olduğu üzere bilâ-mu‘teber gedik-i merkūm İbrahim müstecirim olup şehr-i sâbık Rebî‘ülâhir gāyetinde fesh-i akd-i îcâr etmemle dükkân-ı mezbûru ba‘de’t-tahliyye bana teslîme merkūm İbrahim’e tenbîh olunmak murâdımdır deyü da‘vâ ettikde ol dahi cevâbında bi-tamâmihî ikrâr u i‘tirâf edip lâkin dükkân-ı mezbûrun hevâyi gediği yedimde mülküm olmağla dükkân-ı mezbûru ben zabt ederim demesi ber-mûceb-i fetvâ-yı şerîfe meşrû‘a ve mu‘tebere olmamağla iltifât olunmayıp mûcebiyle dükkân-ı mezbûru ba‘de’t-tahliyye müdde‘î-i merkūm Hâfız Hüseyin Efendi’ye teslîme mezbûr İbrahim’e tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-8 min Ca sene [1]217