İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 374 Hüküm no: 434 Orijinal metin no: [62b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Ağa b. Mehmed’in, bakkal dükkânı gediği davasında İstavri v. Yuvan, Estemad v. Yani ve vârisleriyle sulh ve ibrâ oldukları 450 guruşu vârisleriyle 150 guruşa sulh ve ibrâ Ma‘rûz Sâhib-i arzuhâl Abdullah Ağa b. Mehmed meclis-i şer‘-i enverde derûn-ı arzuhâlde isimleri mastûr İstavri v. Yuvan ve Estemad v. Yani asâleten ve Todori v. Zafiri tarafından husûs-ı âti’l-beyânda vekîl-i şer‘îsi olan Karanfil v. Zafiri zimmîler muvâcehelerinde İstanbul’da Koska’da boyacı dükkânı karşısında kâin Mehmed Ağa dükkânı demekle ma‘rûf bir bâb bakkāl dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i mahsûsanın yüz yirmi sehm i‘tibâriyle yedimde mülküm olan elli üç sehm hisse-i şâyi‘amı bundan akdem hâlik olan Yanaki v. Dimitri zimmîye îcâr ve âlât-ı mezkûre ile dört yüz elli guruş sermâyemi teslîm eylediğimde ol dahi ba‘de’l-kabz sermâye-i mezbûreyi fuzûlî âhara bey‘le istihlâk edip kable’t-tazmîn hâlik olmuşdu el-hâletü hâzihi hâlik-i mesfûrun asîlân-ı mersûmân ile müvekkil-i mersûm kefîlleri olmağla meblağ-ı mezbûrun yüz elli guruşunu rızâlarıyla bana def‘ ve teslîm ben dahi ahz u kabz edip ziyâdesine ve gedik îcâresine müte‘allika âmme-i da‘vâdan tereke-i hâlik-i mersûm ile kefîlleri mersûmûnun zimmetlerini ibrâ-i âm ile ibrâ ve iskāt eylediğimde onlar dahi bana medfû‘ları olan meblağ-ı mezbûr yüz elli guruşun istirdâdına müte‘allika da‘vâdan benim zimmetimi ibrâ ve iskāt ve her birimiz ber-vech-i muharrer âharın ibrâsını kabûl eyledik deyü ikrâr ve tasdîkleri İslâmbol Mahkemesi’nden huzûr-ı âlîlerine i‘lâm olundu. Fî-9 min Ca sene [1]217