İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 375 Hüküm no: 435 Orijinal metin no: [62b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife bt. Mehmed’in, Süleyman Ağa b. Mustafa ile bedel-i sulh karşılığında anlaştıkları 200 guruş murâbaha da‘vâsı 25 guruşa sulh ve ibrâ Ma‘rûz Zâtı ta‘rîf-i şer‘î ile mu‘arrefe olan Afife bt. Mehmed nâm Hatun ile sadriye-i kebîre kızı kezâlik zâtı mu‘arrefe Fâtıma bt. Hüseyin nâm Hatun hâzıra olduğu hâlde meclis-i şer‘-i enverde bâ‘isü’l-i‘lâm Kettânî Süleyman Ağa b. Mustafa mahzarında ben bundan akdem mezbûr Süleyman Ağa yedinden iktirâz ve kabz ve ba‘dehû kendiye def‘ ve teslîm eylediğim bin guruş için mezbûr Süleyman Ağa târih-i i‘lâmdan iki sene mukaddem bilâ-devr mahz-ı ribâ olarak malımdan iki yüz guruşumu ahz etmekle meblağ-ı mezkûr iki yüz guruşu mezbûr Süleyman Ağa’dan istirdâd ederim deyü tasaddî eylediğim da‘vâmdan bâ-vesâtet-ı muslihîn mezbûr Süleyman Ağa ile kat‘an li’n-nizâ‘ yirmi beş guruş bedel-i makbûza ba‘de’s-sulh ve’l-kabûl ziyâdesine ve bi’l-cümle husûs-ı mezkûre vesâire müte‘allika âmme-i da‘vâdan ben ve kızım hâzıra-i mezbûre Fâtıma Hatun’dan her birimiz mezbûr Süleyman Ağa’nın zimmetini kabûlü hâvi ibrâ-i âmm-ı sahîh-i şer‘î ile ibrâ ve iskāt eyledik deyü ba‘de’l-ikrâr ve’t-tasdîk bu vechile kat‘-ı münâza‘a eyledikleri İstanbul Mahkemesi’nden huzûr-ı âlîlerine i‘lâm olundu. Fî-min-Ca sene [1]217