İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 375 Hüküm no: 436 Orijinal metin no: [62b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Fâtıma bt. Mehmed’in, cariye davasında Sahaf Hasan Efendi b. Halil’in zimmetini ibrâ ettiği Arab câriye da‘vâsı meccânen ibrâ Sâhibe-i arzuhâl mu‘arrefetü’z-zât Şerîfe Fâtıma bt. es-Seyyid Mehmed Haşim meclis-i şer‘-i şerîf-i enverde derûn-ı arzuhâlde ismi mezkûr Sahaf Hasan Efendi b. Halil nâm kimesne mahzarında târih-i i‘lâmdan beş ay mukaddem gāib ani’l-meclis Esirci Ahmed nâm kimesneye terbiye etmek için malımdan emâneten teslîm eylediğim bir re’s zenciye câriyemi gāib-i mezbûr Ahmed merkūm Hasan Efendi’ye fuzûlî bey‘ ve teslîm ve kabz-ı semen edip lâkin ben ber-vech-i muharrer bey‘ini mucîze olmayıp câriye-i mezbûre hâlâ merkūm Hasan Efendi’nin yedinde mevcûd olmağla câriye-i mezbûreyi bana teslîme merkūm Hasan Efendi’ye tenbîh olunmak murâdımdır deyü da‘vâ ettikde ol dahi cevâbında sen câriye-i mezbûreyi târih-i mezbûrda gāib-i mezbûra âhara bey‘ için def‘ ve teslîme ve tarafından bey‘e tevkîl etmekle ol dahi câriye-i mezbûreyi bana bi’l-vekâle beş yüz seksen guruş semen-i medfû ve makbûza bey‘ ben dahi ba‘de’l-iştirâ ve’l-kabz âhara bey‘ etmişdim deyü beni def‘e tasaddî ve ol vechile beynimizde ba‘de vukū‘ı’l-münâza‘a bâ-tavassut-ı muslihîn ben ber-vech-i muharrer tasaddî eylediğim da‘vâmdan meccânen fâriğa olmamla husûs-ı mezkûra ve câriye-i merkūmeye ve semenine müte‘allika da‘vâdan merkūm Sahaf Hasan Efendi’nin zimmetini kabûlünü hâvi ibrâ-i âmm-ı sahîh-i şer‘î ile ibrâ ve iskāt eyledik deyü ba‘de’l-ikrâr ve’t-tasdîk bu vechile kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî-9 min Ca sene [1]217