İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 376 Hüküm no: 437 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ali Usta b. Mustafa’nın, malik olduğu sabuncu gediğinin yarım hissesini Mehmed b. Ahmed’e sattığı 760 guruşa sabuncu gediği mübâya‘ası Sehven kaydolunmağla tekraren hüccet siciline kaydolunmuşdur gaflet olunmaya Âsitâne-i aliyyede vâki‘ sabuncu esnâfından es-Seyyid Ali Usta b. es-Seyyid Mustafa meclis-i şer‘-i şerîf-i enverde işbu bâ‘isü’l-kitâb es-Seyyid Mehmed b. es-Seyyid Ahmed mahzarında ikrâr-ı tâm ve takrîr-i kelâm edip İstanbul’da Uzunçarşı kurbünde Suluhan kapısında vâki‘ bir bâb sabuncu dükkânı derûnunda mevcûde beyne’l-hıref gedik tâ‘bir olunur âlât-ı lâzıme-i ma‘lûmelerin nısf hisse-i şâyi‘ası akd-i âti’z-zikrin sudûruna değin yedimde mülk ve hakkım olmağla ben ber-vech-i muharrer mâlik olduğum nısf hisse-i şâyi‘ası tarefeynden icâb ve kabûlü havi şürût-ı müfside ve muvâza‘adan âri bey-i bât-ı sahîh-i şer‘î ve safka-i vâhide ile merkūm es-Seyyid Mehmed’e yedi yüz altmış guruşa bey‘ ve temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz eyledikden sonra semeni olan meblağ-ı mezbûr yedi yüz altmış guruşu müşteri-i merkūm yedinden tamamen ahz u kabz edip mebî‘-i mezkûrun tağrîr ve gabnine müte‘allika âmme-i de‘âvî ve mütâlebâtdan her birimiz âharın zimmetini ibrâ-yı âmm-ı sahîh-i şer‘î ile ibrâ ve iskāt ve her birimiz ber-minvâl-i muharrer âharın ibrâsını kabûl eyledik fîmâ ba‘d gedik tâ‘bir olunur âlât-ı lâzıme-i ma‘lûmelerin nısf-ı şâyi‘inde benim aslan ve kat‘an alâka ve medhalim kalmayıp müşteri-i merkūm es-Seyyid Mehmed’in mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî-11 min Ca sene [1]217 Şuhûdü’l-hâl: Kethüdâ es-Seyyid el-Hâc Ali Ağa b. es-Seyyid Ahmed, es-Seyyid Mehmed Usta b. es-Seyyid Mustafa, es-Seyyid Halil Usta b. es-Seyyid Mustafa, es-Seyyid Halil Usta b. es-Seyyid Süleyman, es-Seyyid Hasan Usta b. es-Seyyid el-Hâc Ali