İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 379 Hüküm no: 439 Orijinal metin no: [63b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arakil v. Yavan’ın, Rüstempaşa Vakfı’ndan icareli altı bab dükkân gediğini Şerife Zeliha bt. Mehmed’e sattığı Sultan odaları hânında oda ve gedik mübâya‘ası, guruş 1.550 Ma‘rûz İstanbul’da Kumkapı kurbünde Balipaşa Mahallesinde mütemekkin Arakil v. Yavan nâm zimmî meclis-i şer‘-i enverde bâ‘isetü’l-i‘lâm Şerîfe Zeliha bt. es-Seyyid Mehmed nâm Hatun mahzarında takrîr-i kelâm edip İslâmbol’da Mahmudpaşa câmi‘-i şerîfi kurbünde müteveffâ Rüstempaşa Evkāfı musakkafâtından sultan odaları demekle arîf bir bâb hân derûnunda kâin fevkānî ve tahtânî altmış bir bâb oda ve kahve ve hân-ı mezkûr hâricinde altı bâb dükkânlar derûnlarında mevcûde gedik tâ‘bir olunur işbu bir kıt‘a fermân-ı âlîşân mantûkunca mülk-i müşterâm ola âlât-ı lâzıme-i ma‘lûmelerden hân-ı merkūmda fevkānîsinde sol tarafda dokuzuncu ve onuncu odaların gedikleri âlât-ı lâzıme-i ma‘lûmelerimi tarefeynden bi’l-icâb ve’l-kabûl merkūme Şerîfe Zeliha Hatun’a bi-safkatin vâhidetin bin beş yüz elli guruş semen-i medfû‘ ve makbûza bâtten ve sahîhan bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra mebî‘-i mezkûrun tağrîr ve gabnine müte‘allika âmme-i da‘vâdan tarefeynden her birimiz âharın zimmetini ibrâ ve iskāt ve her birimiz ber-minvâl-i meşrûh ibrâsını kabûl edip zikr olunan gedik tâ‘bir olunur âlât-ı lâzıme-i ma‘lûmelere benim aslan ve kat‘an alâka ve medhalim kalmayıp merkūme Şerîfe Zeliha Hatun’un mülk-i müşterâsı ve hakk-ı sırfı olmuşdur dedikde merkūme Şerîfe Zeliha Hatun ba‘de’t-tasdîk zikr olunan iki bâb odaların gedik tâ‘bir olunur âlât-ı lâzıme-i ma‘lûmeleri mersûm Arakil üzerinden ref‘ ve terkīn ve merkūme Şerîfe Zeliha Hatun üzerine Başmuhâsebe’ye kayd ve emr-i âlî-i mezkûrdan ihrâc olunup yedine sûret i‘tâ buyrulmasını istid‘â eyledikleri İstanbul Mahkemesi’nden huzûr-ı âlîlerine i‘lâm olundu. Fî-15 min Ca sene [1]217