İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 379 Hüküm no: 440 Orijinal metin no: [63b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salutacı Bali v. Yorgi’nin şerbetçi nizamına uyacağını taahhüt etmesi İki nefer şerbetçi bayâğı men‘i Ma‘rûz Şerbetçi ve Salutacı Bali v. Yorgi nâm zimmî meclis-i şer‘-i enverde Âsitâne-i aliyye ve bilâd-ı selâsede vâki‘ kebabcı ve aşçı ve şerbetçi ve hoşabçılar kethüdâsı es-Seyyid Hasan Ağa ve yiğitbaşı Ali Usta ve Hacı Hüseyin Usta ve re‘âyâdan Pehlivan ve Markar ve Usta Batemi vesâir Müslim ve zimmî ustalar muvâcehelerinde ben İstanbul’da Küçükpazar kolluğu karşısında şerbetçi olup dükkân-ı mezbûrdan üç nefer şerbet bayağı taşraya çıkarmak murâd eylediğimde merkūmûn men‘ ederler suâl olunup mümâna‘atı men‘ ü def‘ olunmak murâdımız dedikde onlar dahi cevâblarında işbu yedimizde olup dergâh-ı âlî yeniçerileri ağasına hitâben bir kıt‘a emr-i âlî nâtık olduğu üzere birbirimize kefîl seksen bir nefer şerbetçi ve yirmi bir nefer re‘âyâ ve on dokuz nefer Yahûdi olup ziyâde olmamak ve boyalı şerbet satmamak ve ayak şerbetçi ve ecânibden bilâ-kefîl san‘atımıza kimesne karışmamak şürût-ı nizâmımızdan olmağla binâen aleyh mümâna‘at ederiz deyü takrîrlerine mutâbık bir kıt‘a ibrâz eylediği fermân-ı âlîşânın mazmûnunu mersûm Bali zimmî tasdîk ettikden sonra esnâf-ı merkūme dahi mersûm Bali zimmî ancak dükkân-ı mezbûrdan bir nefer şerbet bayağı çıkarmak üzere râzılar oldukda mersûm Bali zimmî dahi ber-mûceb-i emr-i âlî ve kadîm olageldiği üzere hareket etmeğe ta‘ahhüd edip bu vechile kat‘-ı nizâ‘ eyledikleri İslâmbol Mahkemesi’nden huzûr-ı âlîlerine i‘lâm olundu. Fî-8 min Ca sene [1]217