İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 380 Hüküm no: 441 Orijinal metin no: [63b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salutacı Bali v. Yorgi’nin şerbetçi nizamına uyacağını taahhüt etmesi Ta‘ahhüd Ma‘rûz Şerbetçi Salutacı Bali v. Yorgi nâm zimmî meclis-i şer‘-i şerîf-i enverde Âsitâne-i aliyyede ve bilâd-ı selâsede vâki‘ kebapçı ve aşçı ve şerbetçi ve hoşâbçı kethüdâsı es-Seyyid Hasan Ağa ve yiğitbaşı Ali Usta ve Hacı Hüseyin Usta ve re‘âyâdan Pehlivan ve Markar ve Usta Batemi vesâir Müslim ve zimmî ustalar muvâcehelerinde ben İslâmbol’da Küçükpazar kolluğu karşısında şerbetçi olup dükkân-ı mezbûrdan üç nefer şerbet bayağı taşraya çıkarmak ve balık tabh etmek murâd eylediğimde merkūmun men‘ ederler suâl olunup mümâna‘atı men‘ ü def‘ olunmak murâdımdır dedikde onlar dahi cevâblarında işbu yedimizde olup dergâh-ı âlî yeniçeri ağasına hitâben bir kıt‘a fermân-ı âlî nâtık olduğu üzere birbirimize kefîl seksen bir nefer Müslim şerbetçi ve yirmi bir nefer re‘âyâ ve on dokuz nefer Yahûdi olup ziyâde olmamak ve boyalı şerbet satmamak ve ayak şerbetçi çıkmamak ve ecânibden bilâ-kefîl san‘atımıza kimesne karışmamak şürût-ı nizâmımızdan olmağla binâen aleyh mümâna‘at ederiz deyü takrîrlerine mutâbık ibrâz eylediği fermân-ı âlîşânın [64a] mazmûnunu mesfûr Bali zimmî tasdîk ettikden sonra esnâf-ı merkūme dahi mersûm Bali zimmî ancak dükkân-ı mezbûrdan bir nefer şerbetçi bayağı çıkarmak üzere râzılar oldukda mesfûr Bali zimmî dahi ber-mûceb-i emr-i âlî hareket-birle dükkân-ı mezbûra kadîmi olageldiği vech üzere ancak şerbet ve saluta bey‘ edip balık tabh etmemek üzere ta‘ahhüd etmekle bu vechile beynleri ıslâh olunduğu İstanbul Mahkemesi’nden huzûr-ı âlîlerine i‘lâm olundu. Fî-8 min Ca sene 1217