İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 381 Hüküm no: 442 Orijinal metin no: [64a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabuncu Mehmed Emin ve babası Hacı Halil’in içki içmeleri ve kötü hallerinden dolayı mahalleden çıkarılmaları Hurûclarını iltimâs Ma‘rûz Ashâb-ı arzuhâl İstanbul’da Sulusaray civârında Hacı Demirci Mahallesi İmâmı Hüseyin Efendi ve Müezzini Ali Efendi ve ahâlîsinden ve Osman ve Halil ve Eyüb Alemdâr ve Aşûreci Mustafa ve Yemişçi el-Hâc Mehmed ve Kafesci Mustafa ve Kahveci Mehmed ve Manav Mehmed ve Ali ve İsmail ve Yakub ve Hüseyin ve es-Seyyid Hasan Efendi ve Kömürcü Veliyüddin ve es-Seyyid Mehmed Efendi ve Süleyman ve Ali ve es-Seyyid Mehmed Efendi nâm kimesneler meclis-i şer‘-i şerîf-i enverde zikr olunan Sulusaray’da sabuncu olup mahalle-i mezbûrede sâkin derûn-ı arzuhalde mezkûrü’l-ism Mehmed Emin ve babası Hacı Halil mahzarlarında mezbûrân mahallemiz sâkinlerinden olup lâkin kendi ırzıyla mukayyedler olmayıp dâimâ mechûlü’l-ahvâl şâbb-ı emred ve mazanne-i sû-i töhmet makūlelerini menziline idhâl ve alenen şürb-ı hamr edip gecelerde mest-i lâ-yukāl olup bi’d-defa‘ât kendilere nush u bend olundukda kabûl etmeyip ef‘âl-i şenî‘alarında ısrâr edip ol vechile kendilerden emn ve rahatımız meslûb olmuşdur deyü muvâcehelerinde sû-i hâllerini ihbâr ve mahalle-i mezbûreden hurûclarını işbu arzuhâlleriyle istid‘â eyledikleri İslâmbol Mahkemesi’nden huzûr-ı âlîlerine i‘lâm olundu. Fi’l-yevmi’s-sâni ve’l-ışrîn min-Cumâde’ûlâ li-sene seb‘a aşarete ve mi’eteyn ve elf.