İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 381 Hüküm no: 443 Orijinal metin no: [64a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Telo v. Kuko ve ortağı Margarit v. Kostandi’nin, kestikleri koyunların iç yağını narh-ı carisi üzerine Mumcu Mustafa’ya satacaklarını taahhüt etmeleri Ma‘rûz Bâ-sahh İstanbul kādısı faziletlü efendi i‘lâmınızda münderic nizâmı sicille kayd ettirip muktezâsını icrâya himmet eyleyesiz deyü buyruldu. Fî-29 Ca sene [1]217 Sâdır olan fermân-ı âlîşâna imtisâlen mumcular kethüdâsı ve yiğitbaşısı hâzır oldukları hâlde Medîne-i Üsküdar’da Ayazma İskelesi Mumcusu Mustafa işbu takrîrde mezkûr husûsun tanzîmi için istintak olunduklarında Medîne-i mezbûrede Kavaksarayı nâm mahalde vâki‘ müceddeden binâ olunan ocağın neferâtı için külle yevm mahâll-i mezkûrda kâin selhhânede zebh olunan ağnâmın iç yağını mahâll-i mezkûr kasabı bilâ-ihtifâ takımıyla bana narh-ı cârisi üzere teslîm ederse takrîrde mezkûr ocağın neferât ve zâbıtân için yevmiye iktizâ eden şem-i revganı kâfi ve vâfî idare ederim deyü ta‘ahhüd ve râzı oldukda mahâll-i mezkûr kasabı olan Telo v. Kuko ve şerîki Margarit v. Kostandi fîmâ ba‘d zebh eyledikleri bi’l-cümle ağnâmın takımıyla iç yağını mumcu merkūma narh-ı cârisi üzere teslîme ta‘ahhüd edip husûs-ı mezbûr bu vechile tanzîm olunduğu İslâmbol Mahkemesi’nden huzûr-ı âlîlerine i‘lâm olundu. Fî-23 min Ca sene [1]217