İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 382 Hüküm no: 444 Orijinal metin no: [64a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçüoğlu Davit v. Markar’ın, Kabril v. Karabet’e olan borcunu ödemesi gerektiği 1.903 guruş edâya tenbîh Arzuhâl eden kürkçü Hoce Kapril v. Karabet nâm zimmî bi’t-terâzi meclis-i şer‘-i şerîf-i enverde derûn-ı arzuhâlde mastûr’ül-ism Kürkçüoğlu Davit v. Markar nâm zimmî muvâcehesinde mersûm Davit zimmî zimmetinde semen-i mebîden bin dokuz yüz üç guruş alacağım olup hatta mersûm Davit zimmî meblağ-ı mezbûr zimmetinde sahîhan bana deyni olduğunu târih-i i‘lâm şehri Cemâziyelevvelinin on birinci günü ikrâr ben dahi târih-i mezbûrdan otuz bir gün tamamına dek meblağ-ı mezbûru te’cîl ettikden sonra mersûm Davit zimmî târih-i mezbûr ile muvarrah yedime işbu bir kıt‘a deyn temessükünü dahi vermekle meblağ-ı mezbûr bin dokuz yüz üç guruşu ecel-i mezbûr hulûlünde mersûm Davit zimmîden taleb ederim deyü da‘vâ ettikde ol dahi kaziyye minvâl-i muharrer üzere olduğunu bi-tamâmihâ ikrâr u i‘tirâf etmeğin mûcebiyle meblağ-ı mezbûr bin dokuz yüz üç guruşu ecel-i mezkûr hulûlünde müdde‘î-i mersûm Kapril zimmîye edâ ve teslîme mersûm Davit zimmîye tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-21 min Ca sene [1]217