İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 382 Hüküm no: 445 Orijinal metin no: [64a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abacı Tanaş v. Apostal tarafından bıçakla yaralanarak öldürülen Boyacı Yani’nin yakınlarının kısastan vazgeçtikleri ve sulh oldukları Cerhden ibrâ Ma‘rûz İstanbul’da boyacı olup bundan akdem mecrûhan hâlik olan boyacı Yani zimmînin ebeveyni ve hasran vârisleri Karyana v. Sato ve Todora bt. Ganebet Nasrâniyeden arzuhâl eden mesfûr Karyana zimmî kendiden asâleten zevcemi ve hâlik-i mersûmun anası mesfûre Todora Nasrâniye tarafından dahi husûs-ı âtîde vekîl olduğu şahsını ârifân hâlik-i mersûmun karındaşı Yorgaki ve Felimen v. Anderya şehâdetleriyle sâbit olmağla vekâleten meclis-i şer‘-i enverde derûn-ı arzuhâlde mezkûrü’l-ism Abacı Tanaş v. Apostal zimmî muvâcehesinde mersûm Tanaş zimmî İslâmbol’da Çukurçeşme’de abacılar çarşısında kâin dükkânında oğlum ve mûrisimiz mesfûr Yani zimmîyi târih-i i‘lâm şehri gurresi gecesi evvelâ ağzına ve başına hatab ile ba‘dehû âlât-ı cârihadan addolunan Çerkes bıçağı ile iki tarafdan memeleri altından amden ve bî-gayrı hakkın darb ve on anda müteessiren hâlik oldukdan sonra yanında mevcûd üç yüz guruş nakdini dahi ahz edip hatta şehr-i merkūmun üçüncü günü mesfûr Tanaş zimmî Mahmudpaşa mahkemesinde meclis-i şer‘de ikrâr dahi etmekle cinâyet-i mezkûrenin mûceb-i şer‘îsi ile hâlik-i mesfûrun zimmetinde alacağım sekiz yüz guruş hîn-i hâlikinde fuzûlî ahz eylediği üç yüz guruş ki cem‘an bin yüz guruşu bi’l-asâle ve bi’l-vekâle taleb ederim deyü da‘vâ sadedinde olmuşdum el-hâletü hâzihi beynimiz ıslâh ve tevfîk olunup mesfûr Tanaş zimmî meblağ-ı mezkûr bin yüz guruşu tamamen def‘ ve teslîme ta‘ahhüd ettikde ben dahi cinâyet-i mezkûrenin mûcebi olan kısastan bi’l-asâle ve bi’l-vekâle fâriğ oldum deyü ikrârını mesfûr Tanaş zimmî tasdîk eylediği İslâmbol Mahkemesi’nden huzûr-ı âlîlerine i‘lâm olundu. Fî-23 min Ca sene [1]217