İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 383 Hüküm no: 446 Orijinal metin no: [64a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Osman Efendi b. İbrahim’in, Seyyid Ali b. Mehmed’e olan borcunu ödemesi gerektiği 265 guruş edâya tenbîh Ma‘rûz Sâhib-i arzuhâl kapıcı es-Seyyid Ali b. es-Seyyid Mehmed nâm kimesne meclis-i şer‘-i enverde derûn-ı arzuhâlde mezkûrü’l-ism es-Seyyid Osman Efendi b. İbrahim mahzarında mezbûr es-Seyyid Osman Efendi uhde-i iltizâmında olan Diyârbekir sancağında Birecik kazâsında Elbesun nahiyesinde vâki‘ bahçeçik ve tevâbi‘i mukāta‘ayı bin iki yüz on üç senesine mahsûben bir seneliğini Martı ibtidâsından zabt etmek üzere bana iki yüz beş guruşa ilzâm ben dahi iltizâm ve bedel-i iltizâmı olan meblağ-ı mezbûru benden peşin kabz edip lâkin ben sene-i mezbûrede mukata‘a-i mezkûreyi zabt ve ta‘şîr edemememle medfû‘um olan bedel-i iltizâm mezkûr iki yüz altmış beş guruşu merkūm es-Seyid Osman Efendi’den istirdâd ederim deyü da‘vâ ettikde [64b] ol dahi cevâbında bi-tamâmihî ikrâr u i‘tirâf lâkin ben bedel-i iltizâm-ı mezkûru mukata‘a-i mezkûrenin bâ-berât mutasarrıfı es-Seyyid Ahmed’in zevcesine teslîm etmemle meblağ-ı mezkûru müdde‘î-i merkūm es-Seyyid Ali zevce-i mezbûreden mütâlebe eylesin demesi meşrû‘a olmamağla iltifât olunmayıp mûcebiyle meblağ-ı mezbûr iki yüz altmış beş guruşu müdde‘î-i merkūm es-Seyyid Ali’ye red ve teslîme merkūm es-Seyyid Osman Efendi’ye tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-23 min Ca sene [1]217