İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 384 Hüküm no: 447 Orijinal metin no: [64b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sahak v. David’in, Hayem v. Mosi aleyhine açtığı alacak davasında iddiasını ispat edemediğinden muarazadan men edildiği 1.920 guruş mu‘ârazadan men‘ Ma‘rûz Derûn-ı arzuhâlde mezkûrü’l-ism pabuççu Sahak v. David nâm zimmî bi’t-terâzi meclis-i şer‘-i enverde arzuhâl eden Hayem v. Mosi nâm Yahûdi muvâcehesinde gāib ani’l-meclis Yakonam Yahûdi zimmetinde beynimizde câri ahz u i‘tâmızdan bâkī alacağım olan bin dokuz yüz yirmi guruşa târih-i i‘lâm-ı şehri Rebî‘ülevveli gurresinde İstanbul’da Mercan çarşısında kâin Ali Paşa Hânında Pabuççu Paskal zimmî odasında tarefeynden bi’l-emr ve’l-kabûl mesfûr Hayem Yahûdi kefîl ve zâmin olmağla meblağ-ı mezkûr bin dokuz yüz yirmi guruşu kefâletine binâen mersûm Hayem Yahûdi’den hâlâ taleb ederim deyü ba‘de’d-da‘vâ ve’l-inkâri’l-küllî müdde‘î-i mesfûr Sahak zimmî ber-vech-i muharrer müdde‘âsını isbât için kirâren ve mirâren müddet-i mehl-i şer‘î mürûrunda getirdiği iki nefer zimmîler edâ-yı şahâdet-i şer‘iyye edememekle makbûle olmayıp şâhid-i âhar ikāmetine havâle olundukda isbâtdan ızhâr-ı acz edip istihlâf ettikde mesfûr Hayem Yahûdiye bi’l-muvâcehe vech-i şer‘î üzere yemîn verilmeğin mûcebiyle müdde‘î-i mesfûr Sahak zimmî da‘vâ-yı mezkûresiyle mersûm Hayem Yahûdiye bilâ beyyine-i âdile mu‘ârazadan men‘ olunduğu İslâmbol Mahkemesi’nden huzûr-ı âlîlerine i‘lâm olundu. Fî-23 min Ca sene [1]217