İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 384 Hüküm no: 448 Orijinal metin no: [64b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agob v. Haçok’un vârislerinden Malkon’un, Avadis v. Kirkor aleyhine açtığı fırın ve değirmen davasında iddiasını ispat edemediğinden muarazadan men edildiği Bayrampaşa fırını ve ona merbût değirmen nizâ‘ı mu‘ârazadan men‘ Ma‘rûz Habbâz tâifesinden olup bundan akdem hâlik olan Agob v. Haçok zimmînin verâseti Eğin kazâsına tâbi‘ Badır karyesinde mütemekkineler zevcesi Haropsima bt. Tomas nâm Nasrâniye ile sulbiye-i sagīre kızı Takohi ve anası Elmas bt. Karabet nâm Nasrâniyelere ve Âsitâne-i aliyyede mütemekkin kebîr oğlu Malkon zimmîye inhisârı tahkīkinden sonra arzuhâl-i mersûm Malkon zimmî meclis-i şer‘-i enverde zikri âtî gedik-i âlâta vaz‘-ı yedi mütehakkık olan kezâlik habbâz tâifesinden Avanes v. Kirkor muvâcehesinde İslâmbol’da Haseki kurbünde Bayrampaşa fırını ve ona merbût derûnunda kâin otuz iki sehm i‘tibâr olunur beşi ekmekçi ve üçü uncu sekiz horoslu bir bâb değirmen derûnunda mevcûde beyne’l-esnâf gedik tâ‘bir olunur iki re’s bârgir ve ona isâbet eden âlât-ı lâzıme-i ma‘lûmeden sekizi ekmekçi ve dördü uncu cem‘an on iki re’s bârgir vesâir âlât-ı lâzıme-i ma‘lûme babam hâlik-i mersûmun ile’l-helâk yedinden mülkü ve ba‘de helâkihî benimle verese-i sâire-i mezkûresine mevrûs olmuşken zikr olunan on iki re’s bârgirden dördü ekmekçi ve ikisi uncu olmak üzere cem‘an altı re’s bârgire isâbet eden âlât-ı lâzıme-i ma‘lûmeyi mersûm Avanes zimmî fuzûlî zabt etmekle suâl olunup hisse-i irsiyyemden keff-i yedi murâdımdır deyü da‘vâ ettikde ol dahi cevâbında zikr olunan altı re’s bârgir ve ona isâbet eden âlât-ı lâzıme-i ma‘lûmeye vaz‘-ı yedini ikrâr lâkin işbu yedimde olup bin iki yüz on bir senesi Zilka‘desinin yedinci günü târihiyle muvarrah ol târihde İslâmbol kādısı bulunan merhûm Ebûbekir Paşazâde Hamdullah Efendi hazretlerinin imzâsıyla mümzât bir kıt‘a hücceti nâtıka olduğu üzere mersûm Agob zimmînin helâkinden sonra zikr olunan altı re’s bârgir ve ona isâbet eden âlât-ı lâzıme-i ma‘lûmeleri hâlik-i mesfûrun düyûn-ı müsbitesi için vasî-i muhtârı olan mersûm Malkon zimmî kıbel-i şer‘den me’zûn olduğu hâlde ol târihde semen-i misli idüğü zâhir olan altı yüz guruş semen-i medfû‘ ve makbûza bana bi’l-asâle ve bi’l-vesâye bey‘ ben dahi iştirâ ve kabz ve kabûl edip târih-i mezbûrdan beri mülk-i müşterâmdır deyü mazmûn-ı takrîr-i meşrûhuna mutâbık bir kıt‘a hüccet-i şer‘iyye ibrâzıyla eylediği def‘ini mesfûr Malkon zimmî ikrâr u i‘tirâf etmeğin mûcebiyle müdde‘î-i mesfûr Malkon zimmî da‘vâ-yı mezkûresiyle mersûm Avadis zimmîye bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî-15 min Ca sene [1]217