İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 385 Hüküm no: 449 Orijinal metin no: [64b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habîbe Hatun’un geçimsiz ve kötü ahlaklı olmasından dolayı mahalleden çıkarıldığı Mahalleden ihrâc Ma‘rûz İstanbul’da Kumkapı kurbünde Tavâşî Süleyman Ağa Mahallesi İmâmı Hasan Efendi ve Müezzini Molla es-Seyyid Ahmed ve ahâlîsinden el-Hâc Mehmed Sâdık Efendi ve Kahveci Yusuf Ağa ve kahveci Mustafa Ağa ve Bezzâzistâni Veliyüddin Ağa ve Şamdancı Mehmed ve Berber Hasan ve Manav Osman ve Ebûbekir Ağa ve el-Hâc Memiş Ağa ve el-Hâc Ali Ağa ve Duhâncı el-Hâc Halil Ağa ve Kömürcü es-Seyyid Mehmed ve es-Seyyid Ahmed ve Bostanî Hasan ve Tabancacı Mehmed ve Üsküdarî Ali Ağa ve Balmumcu Mehmed ve Osman Efendi ve Duhâncı el-Hâc Ali Ağa ve Bekçi es-Seyyid Osman nâm kimesnelerden her biri meclis-i şer‘-i şerîf-i enverde Çavuş es-Seyyid el-Hâc Said Ağa b. es-Seyyid Ahmed mahzarında mezbûr es-Seyyid Said Ağa mahallemiz sâkinelerinden olup lâkin kendi ırzıyla mukayyed olmayıp kendisi ve oğlunun kızı gāibe ani’l-meclis Habîbe Hatun’dan her biri hadîdü’l-lisân ve bed-zebân olduklarından dâimâ bize şütûm-ı galîza ile şetm ve kendilere bi’d-defa‘ât nush u pend olundukda kabûl etmeyip ef‘âl-i redîlerinde ısrâr edip ol vechile cümlemizin kendilerden emn ve rahatımız meslûb olmuşdur deyü sû-i hâllerini her biri ihbâr ve mahalle-i mezbûreden hurûclarını istid‘â ettiklerinde mezbûr es-Seyyid Said Ağa dahi târih-i i‘lâmdan beş gün mürûrunda mezbûre Habîbe Hatun ile mahalle-i mezbûreden âhar mahalle nakle ta‘ahhüd eylediği İslâmbol Mahkemesi’nden huzûr-ı âlîlerine i‘lâm olundu. Fî-25 min Ca sene [1]217