İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 386 Hüküm no: 450 Orijinal metin no: [65a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Mehmed Emin’in vârislerinin, dem diyetinde Kutucu Mehmed ile bedel-i sulh karşılığında anlaştıkları Dem diyetinden 200 guruş üzerine sulh ve ibrâ Ma‘rûz İslâmbol’da Molla Aşkī Mahallesi sâkinlerinden iken bundan akdem mecrûhan vefât eden Mustafa b. Mehmed Emin nâm kimesnenin verâseti vâlidesi Emetullah bt. Mustafa ile on beş yaşında olup bülûğunu mukırr u mu‘terif olan li-ümmin er karındaşı Salih b. Mustafa’ya inhisârı tahakkukundan sonra sâhibe-i arzuhâl mu‘arrefetü’z-zât mezbûre Emetullah ile mezbûr Salih meclis-i şer‘-i şerîf-i enverde derûn-ı arzuhâlde mezkûrü’l-ism Kutucu Mehmed’in babası tarafından husûs-ı âtîde tasdîka vekîli Mehmed b. Ahmed muvâcehesinde müvekkil-i merkūm Kutucu Mehmed târih-i i‘lâm-ı şehrînin on sekizinci Cuma günü akşama karib Eğrikapı hâricinde piştov kurşunuyla oğlum ve mûrisimiz mezbûr Mustafa’yı ağzından hatâen darbedip ol anda müteessiren fevt olmağla mûceb-i şer‘îsine müvekkil-i mezbûrdan taleb ederiz deyü bundan akdem da‘vâ sadedinde olduğumuzda ol dahi inkâr edip ol vechile beynimizde ba‘de vukū‘ı’l-münâza‘a bâ-tavassut-ı muslihîn ben ber-vech-i muharrer tasaddî eylediğimiz da‘vâ-yı mezkûremizden müvekkil-i mezbûr ile an inkâr kat‘an li’n-nizâ‘ iki yüz guruş bedel-i makbûza ba‘de akdi’l-musâlahati ve’l-kabûl husûs-ı mezbûra ve müteveffâ-i mezbûrun dem ü diyetine müte‘allika âmme-i de‘âvî ve mütâlebâtdan müvekkil-i mezbûr Kutucu Mehmed’in zimmetini ibrâ-yı âmm-ı râfi‘u’l-hısâm ile ibrâ ve iskāt eylediğimizde ol dahi bi’l-vekâle ibrâ-i mezkûrumuzu kabûlle külliyen kat‘-ı münâza‘a eyledik deyü ikrâr ve tasâdukları tescîl ve İstanbul Mahkemesi’nden huzûr-ı âlîlerine i‘lâm olundu. Fî-28 min Ca sene [1]217