İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 387 Hüküm no: 451 Orijinal metin no: [65a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Feleb v. Anko’nun çörekçi ve simitçilerin nizamına göre sadece ekmek satabileceği Kendi hudûdunda ekmek bey‘ine ta‘ahhüd Ma‘rûz Âsitâne-i aliyyede vâki‘ çörekçi ve simitçiler kethüdâsı Ahmed Ağa ve Yiğitbaşı Ahmed ve ustalarından Yazıcı Mehmed ve Zeynel vesâir mazbûtü’l-esâmî kimesneler meclis-i şer‘-i enverde ekmekçi tablakârı Felib v. Anko nâm zimmî muvâcehesinde her biri takrîr-i kelâm edip kadîmü’l-eyyâmdan beri ekmekçi tablakârı başka ve simitçi tablakârı başka olmak beynimizde câri şürût-ı mergūbemizden iken mesfûr Felib zimmî ekmekçi tablakârı olup ekmek bey‘ine kanâ‘at etmeyip İslâmbol’da Osmaniye Kapısının üst tarafında kasablar köşesi nâm mahalde nân-ı azîz tablasında simid bey‘ ve hilâf-ı nizâmımız hareket edip ol vechile beynimizde münâza‘aya müeddî olmağla men‘ olunmak murâdımızdır deyü mersûmdan iştikâ sadedinde olduğumuzda ol dahi fîmâ ba‘d tabla ile ekmek bey‘ etmeğe kanâ‘at edip hilâf-ı nizâm hareket etmemek üzere ta‘ahhüd etmekle bu vechile kat‘-ı nizâ‘ eyledik deyü takrîrlerini mesfûr Feleb zimmî tasdîk eylediği İslâmbol Mahkemesi’nden huzûr-ı âlîlerine i‘lâm olundu. Fî-25 Ca sene [1]217