İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 387 Hüküm no: 452 Orijinal metin no: [65a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki v. Yamandi’nin, Kosta v. Yanaki aleyhine açtığı gedik alâtı davasında iddiasını ispat edemediğinden muarazadan men edildiği Mu‘ârazadan men‘ i‘lâmı Ma‘rûz Bakkāl tâifesinden derûn-ı arzuhâlde ismi mastûr Yanaki v. Yamandi nâm zimmî Çarşamba günü arz odasında huzûr-ı hazret-i âsafîde ma‘kūd meclis-i şer‘-i enverde zikri âtî gedik âlâtına vaz‘-ı yedi mütehakkık olup arzuhâl eden bakkāl Kosta v. Yanaki nâm zimmî muvâcehesinde mersûm Yanaki zimmînin zevcesi şahsı mu‘arrefe Vasilaki bt. Kosta ve kayın anası kezâlik şahsı mu‘arrefe Kiryako bt. Sarekenur nâm Nasrâniyeler hatunlar oldukları hâlde İstanbul’da Zindânkapısı hâricinde ve tuzcular içinde kâin el-Hâc Osman Ağa dükkânı demekle ma‘rûf bir bâb ma‘lûmü’l-hudûd bakkāl dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i mahsûsanın yüz yirmi sehm i‘tibâriyle yirmi beş sehmi kayın vâlidem hâzıra-i mersûme Kiryako Nasrâniyenin yedinde mülkü iken mersûme Kiryako Nasrâniye zikr olunan yirmi beş sehm âlât-ı mahsûsa-i ma‘lûmenin on sehmini yedinde ibkā bâkī on beş sehmini bin iki yüz on bir senesi Zilka‘desinin on beşinci günü ol târihde şer‘iyyâtı bulunan müderrisîn-i kirâmdan Ömer Efendi huzûrunda altı yüz guruş semen-i medfû‘ ve makbûza kızı zevcem hâzıra-i mesfûre ve Vasilaki Nasrâniye bâtten ve sahîhan bâ-hüccet bey‘ ve temlîk ve vech-i lâyıkı üzere teslîm ol dahi ba‘de’l-iştirâ ve’l-kabz zikr olunan on beş sehm âlât-ı mezkûreyi bin iki yüz on üç senesi hilâlinde merhûm-ı mûmâ-ileyh huzûrunda bâ-hüccet bana bâtten ve sahîhan semen-i ma‘lûm ve makbûza bey‘ ve teslîm ben dahi iştirâ ve kabz ve kabûl edip ol vechile on beş sehm âlât-ı mezkûre târih-i mezbûrdan beri mülk-i müşterâm iken mesfûr Kosta zimmî fuzûlî zabt eder suâl olunup keff-i yed-birle on beş sehm âlât-ı mezkûreyi bana teslîme mersûm Kosta zimmîye tenbîh olunmak murâdımdır deyü ancak zevcesi hâzıra-i mersûme ve Vasilaki Nasrâniyenin tasdîkiyle da‘vâ ettikde mesfûr Kosta zimmî cevâbında işbu yedimde olan bin iki yüz on beş senesi Cumâdelâhırenin on beşinci günü târihiyle muvarraha şer‘iyyâtı merhûm-ı mezbûrun imzâsıyla mahtûme bir kıt‘a hüccet nâtıka olduğu üzere mesfûr Yanaki zimmînin kayın anası hâzıra-ı mersûme Kiryako Nasrâniye yedinde mülkü olan mârru’z--zikr yirmi beş sehm âlât-ı mahsûsanın beş sehmini yedinde ibkā mâ‘adâ yirmi sehmini dokuz yüz guruş semen-i medfû‘ ve makbûza bana bâtten ve sahîhan bâ-hüccet bey‘ ve teslîm ben dahi iştirâ ve kabz ve kabûl edip ol vechile âlât-ı mezkûre mülk-i müşterâm olmağla vaz‘-ı yed ederim deyü hâzıra-i mukırra Kiryako Nasrâniye ile ma‘an müdde‘î-i mesfûr Yanaki zimmînin ber-vech-i muharrer müdde‘âsını inkâr etmeleriyle müdde‘î-i mersûm Yanaki zimmî üç ay müddetden beri ve bi’d-defa‘ât müdde‘âsını isbât için beyâna havâle olundukda her birinde kirâren ve mirâren lede’l-istimhâl ve’l-imhâl müddet-i mehl-i şer‘î mürûr edip bir vechile isbât edemeyip istihlâf ettikde lisânen sâdır olan fermân-ı âlîşâna imtisâlen Çarşamba günü dîvân-ı âlilerinde ma‘kūd meclis-i şer‘de bi’l-muvâcehe vech-i şer‘î üzere mersûm Kosta zimmîye yemîn verilmeğin mûcebiyle mersûm Yanaki da‘vâ-yı mezkûresiyle mesfûr Kosta zimmîye bilâ-beyyine mu‘ârazadan ba‘de’l-men‘ mersûm Yanaki zimmî kāni‘ olmayıp bilâ-beyyine kavl-i mücerredinde ısrâr etmekle mesfûr Yanaki zimmînin da‘vâ-yı mezkûresinden tezvîr münfehim olduğu İslâmbol Mahkemesi’nden huzûr-ı âlîlerine i‘lâm olundu. Fî-24 min Ca sene 1217