İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 389 Hüküm no: 453 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zağferancı Seyyid Süleyman’ın, derici esnafının alanına müdahale etmemesi ve kendi sanatıyla meşgul olması gerektiği Tâcir esnâfına dâir i‘lâm Ma‘rûz Âsitâne-i aliyyede vâki‘ tâcir esnâfının kethüdâsı es-Seyyid Hüseyin ve Yiğitbaşı Molla Mustafa ve ihtiyârlarından Mehmed Efendi ve es-Seyyid el-Hâc Hâfız Mehmed Sâdık ve Mehmed ve Ahmed vesâirleri meclis-i şer‘-i enverde Mercan Çukurhânda Zağferancı es-Seyyid Süleyman mahzarında işbu yedimizde olup bir kıt‘a emr-i âlîşân nâtık olduğu üzere Âsitâne-i aliyyeye vürûd eden ecnâs sahtiyân ve meşin ve kavsalanın gümrüğü edâ olundukdan sonra turaları bozulmaksızın gümrük emini ma‘rifetiyle tâcirlerin Mercan sûkunda vâki‘ lonca yeri tâ‘bir olunur mahalle götürülüp çizmecibaşı ve dikicibaşı ve tâcirler kethüdâsı ve yiğitbaşılar ma‘rifetleriyle ba‘de’l-müzâyede tevzî‘ ve taksîm olunmak ve sâhibi vech-i muharrer üzere bey‘inden ibâ vü imtinâ‘ eder ise Mercan sûkunda kendiye bir dükkân küşâd ve bey‘ edince içinde sâkin olup şirâsına tâlib olanlara kendisi bey‘ etmek şürût-ı nizâmımızdan iken mezbûr es-Seyyid Süleyman zağferancı olup kendi kârına kanâ‘at etmeyip san‘atı olmayan sahtiyâncılığa şürû‘ ve kemâl-i tama‘-ı hâmından nâşî bi’l-cümle şürût-ı nizâmımızın hilâfı hareket ile ayakkabının gallâsına ve ziyâde bahâya çıkmasına bâ‘is ve şürût-ı nizâmımızın muhtel ve müşevveş olmasına bâdi olmağla suâl olunup tenbîh olmak murâdımızdır deyü mazmûnu takrîr-i meşrûhuna mutâbık bir kıt‘a fermân-ı âlî ibrâz etmekte merkūm es-Seyyid Süleyman istintak olundukda mazmûn-ı fermân-ı âlîyi tasdîk etmeğin ber-mûceb-i emr-i âlî merkūm es-Seyyid Süleyman hareket etmek üzere merkūm es-Seyyid Süleyman’a tefhîm olunduğu İslâmbol Mahkemesi’nden huzûr-ı âlîlerine i‘lâm olundu. Fî-28 min Ca sene [1]217