İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 389 Hüküm no: 454 Orijinal metin no: [65b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nako v. Papa Kosta’nın, Sultan Abdülhamid Han vakfından icareli, yarım hissesine malik olduğu kasap dükkânı gediğini Nako v. Keriço’ya sattığı Nısf kasab gediği mübâya‘ası Ma‘rûz Hüdâvendigâr-ı sâbık merhûm cennet-mekân firdevs-âşiyân Sultan Abdülhamid Hân Evkāfı musakkafâtından Yedikule hâricinde kâin üçüncü selhhâneye merbût İstanbul’da Kadırga Limanı kurbünde vâki‘ bir bâb kasab dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmelerin nısf hisse-i şâyi‘asına bâ-temessük-ı mütevellî vakf-ı müşârun-ileyh mutasarrıf olan Nako v. Papa Kosta nâm zimmî meclis-i şer‘-i enverde hâssa kasabbaşısı İzzetlü Mustafa Ağa tarafından vekîli kasablar kethüdâsı es-Seyyid Halil Ağa ve ustalarından mazbûtü’l-esâmî kimesneler hâzır oldukları hâlde kasab ustalığını idareye kādir idüğü ihbâr olunan diğer Nako v. Keriço nâm zimmî muvâcehesinde takrîr-i kelâm edip ber-vech-i muharrer mutasarrıf olduğum âlât-ı lâzıme-i ma‘lûmeyi hüsn-i rızâmla bedel-i ma‘lûm ve makbûz mukābelesinde mesfûr diğer Nako zimmîye bâ-re’y-i mütevellî ferağ eylediğimde ol dahi ber-vech-i muharrer tefevvüz ve kabûl edip fîmâ ba‘d zikr olunan nısf-ı âlât-ı lâzıme-i ma‘lûmede benim aslan ve kat‘an alâka ve medhalim kalmayıp mesfûr diğer Nako zimmînin hakk-ı müfevvezi olmuşdur dedikde mesfûr diğer Nako zimmî ba‘de’t-tasdîk zikr olunan nısf-ı âlât-ı lâzıme kendi üzerine defter-i vakfa kaydolunup yedine müceddeden temessük i‘tâsını istid‘â eylediği İstanbul Mahkemesi’nden huzûr-ı âlîlerine i‘lâm olundu. Fî-2 min-Cumâdelâhıre sene [1]217