İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 390 Hüküm no: 455 Orijinal metin no: [65b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haffaf Mehmed Efendi b. Ahmed’in, Mahmud Ağa b. Ebûbekir’e olan borcunu ödemesi gerektiği 286 guruş edâya tenbîh Bâ‘isü’l-i‘lâm Haffâf el-Hâc Mahmud Ağa b. Ebûbekir nâm kimesne meclis-i şer‘-i enverde Haffâf Mehmed Efendi b. Ahmed mahzarında mezbûr Mehmed Efendi zimmetinde haffâf metâ‘ı semeninden iki yüz seksen altı guruş alacağım olup târih-i i‘lâm senesi Saferi’l-hayrın yirmi yedinci günü ikrâr ve karz unvânıyla yedime bir kıt‘a deyn temessükü dahi vermekle meblağ-ı mezbûru hâlâ taleb ederim deyü da‘vâ ettikde ol dahi bi-tamâmihî ikrâr u i‘tirâf edip hâlâ edâya iktidârım yokdur deyü istimhâl ettikde müdde‘î-i merkūm el-Hâc Mahmud dahi rızâsıyla işbu târih-i i‘lâmdan altı ay hitâmında tamamen kendiye edâ etmek üzere merkūm Haffâf Mehmed Efendi’yi imhâl etmeğin mûcebiyle meblağ-ı mezbûr iki yüz seksen altı guruşu mehl-i mezkûr hulûlünde müdde‘î-i merkūm Haffâf el-Hâc Mahmud Ağa’ya edâ ve teslîme merkūm Haffâf Mehmed Efendi’ye tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-4 min-C sene [1]217