İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 391 Hüküm no: 457 Orijinal metin no: [65b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabuncu Şâkir Mustafa’nın tekrar sabun dükkânı açmasına ruhsat verilmesi Sabun kârhânesi küşâdına izin Ma‘rûz Sâhib-i arzuhâl es-Seyyid Şâkir Mustafa meclis-i şer‘-i enverde takrîr-i kelâm edip Âsitâne-i aliyyede Sulusaray nâm mahalde vâki‘ sabunkârhânemde yerli sabunu i‘mâl ve ibâdullâha bey‘ ederken bundan akdem i‘mâl eylediğimiz sabunu yirmi dört paraya bey‘ olunması teklîf olundukda ben ibâ vü imtinâ‘ eylediğime binâen karhâne-i mezkûrem sedd u bende ve ber-vech-i muharrer sabun i‘mâlinden men‘ olunmuşdum lâkin ben fîmâ ba‘d Âsitâne-i aliyyede i‘mâl olunan sabundan a‘lâ ve İstanbul damgası vaz‘ şartıyla i‘mâl ve beher kıyyesini yirmi dört paraya ibâdullâha bey‘e râzı ve ta‘ahhüd etmemle vech-i meşrûh üzere bana bey‘e izin-birle [66a] kârhâne-i mezkûrem küşâd olunması murâdımdır deyü işbu arzuhâliyle istid‘â ve kârhâne-i mezkûre civârında sâkinler olup husûs-ı mezkûra vukūf-ı tâmları olan İmâm Hüseyin Efendi ve Hacı Ahmed ve Osman ve Halil ve Eyüb Alemdâr ve Mustafa ve Hacı Mehmed ve Kafesci Mustafa ve Kahveci Mehmed ve Manav Mehmed ve Ali ve İsmail ve Yakub ve Hüseyin ve es-Seyyid Hüseyin ve Kömürcü Veliyüddin ve es-Seyyid Mehmed ve Süleyman ve Müezzin Ali Molla ve es-Seyyid Mehmed nâm kimesneler dahi mezbûr es-Seyyid Mustafa Şâkir Âsitâne-i aliyyede i‘mâl eden sâir sabuncuların üstâdı ve mezbûrun i‘mâl eylediği sabun cümlesinden a‘lâ olup ve merkūm Mustafa Şâkir’e ber-vech-i muharrer ve ruhsat verilmesi ibâdullâha dahi enfa‘ ve hayr-ı mahzdır deyü her biri haber vermeleriyle merkūm es-Seyyid Mustafa Şâkir’in ber-vech-i muharrer istid‘âsına izin ve ruhsat-birle yedine fermân-ı âlîşân i‘tâ buyrulması husûsu re’y-i âsafânelerine menût olduğu İstanbul Mahkemesi’nden huzûr-ı âlîlerine i‘lâm olundu. Fî-5 min-C sene [1]217