İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 392 Hüküm no: 458 Orijinal metin no: [66a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karabet v. Kirkor’un vârislerinin, kahve gediği davasında Salih Ağa b. Hasan’ın zimmetini ibrâ ettikleri Kahve gediği da‘vâsından ibrâ Ma‘rûz Derûn-ı arzuhâlde mezkûrü’l-ism olup bundan akdem hâlik olan Karabet v. Kirkor v. Avram’ın verâseti zevcesi Foti bt. Asayi Nasrâniye ile sulbî kebîr oğulları Anberson ve Oseb ve Asvadar zimmîlere ve kebîre kızı Hanıma Nasrâniyeye inhisârı tahakkukundan sonra arzuhâl eden mersûmân Anberson ve Oseb zimmîler ile şahsı mu‘arrefe mersûme Hanıma Nasrâniye’den her biri meclis-i şer‘-i enverde zikri âtî gedik âlâtına vaz‘-ı yedi mütehakkık olan Salih Ağa b. Hasan mahzarında mersûm Asvadar zimmî hâzır olduğu hâlde babamız ve mûrisimiz hâlik-i mersûmun ile’l-helâk hayatında yedinde mülkü ve ba‘de helâkihî terekesinden olup bize mevrûs olan İstanbul hısnı ebvâbından Kumkapı hâricinde vâki‘ bir bâb kahve dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i mahsûse-i ma‘lûmeyi mezbûr Salih Ağa fuzûlî zabt etmekle hisse-i irsiyyemizden keff-i yedi murâdımızdır deyü bi’l-asâle ve bi’l-vekâle da‘vâ eylediğimizde ol dahi cevâbında âlât-ı mezkûreye vaz‘-ı yedini ikrâr lâkin işbu yedimde olup târih-i i‘lâm-ı şehrinin on dokuzuncu günü ile muvarrah hâlâ kassâm-ı askerî müderrisîn-i kirâmdan Faziletlü Mehmed Fikri Efendi’nin murâfa‘adan yedime verdiği işbu bir kıt‘a i‘lâm nâtık olduğu üzere, siz ve zevce-i mersûme Foti Nasrâniyeden her biriniz asâleten ve kefâleten benden da‘vâ ve benimle an inkâr yüz elli guruş bedel-i makbûza ba‘de’s-sulh ve’l-kabûl âlât-ı mezkûre müte‘allika âmme-i da‘vâdan dahi zimmetimi ibrâ ve iskāt etmişdiniz deyü mazmûnu takrîrlerine mutâbık bir kıt‘a i‘lâm ibrâzıyla eylediği def‘ini ve mazmûn-ı i‘lâm-ı mezkûru biz ikrâr u i‘tirâf edip mûcebiyle da‘vâ-yı mezkûre şer‘an mesmû‘a olmadığı bize tefhîm olunup bî-vech mu‘ârazadan men‘ olundukdan sonra merkūm Salih Ağa malından teberru‘an doksan üç guruş otuz para def‘ ve teslîm dahi ba‘de’l-ahz ve’l-kabz zikr olunan husûslara âlât-ı muharrer-i mezkûreye müte‘allika âmme-i de‘âvî ve kâffe-i mütâlebâtdan biz ve hâzır-ı mesfûr Asvadar zimmîden her birimiz merkūm Salih Ağa’nın zimmetini ibrâ-yı âmm-ı sahîh-i şer‘î ile ibrâ ve iskāt eylediğimizde ol dahi ber-vech-i muharrer ibrâ-yı mezkûrumuzu kabûl eyledik deyü bi’t-tav‘ ve’r-rızâ ikrâr u i‘tirâflarını merkūm Salih Ağa tasdîk edip bir vechile külliyen kat‘-ı nizâ‘ eyledikleri tescîl ve İstanbul Mahkemesi’nden huzûr-ı âlîlerine i‘lâm olundu. Fî-6 C sene [1]217