İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 393 Hüküm no: 459 Orijinal metin no: [66a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi b. Ahmed’in, Haffaf Mahmud Ağa b. Ebûbekir’e olan borcunu ödemesi gerektiği 741 guruş edâya tenbîh Ma‘rûz Derûn-ı arzuhâlde mezkûrü’l-ism Haffâf el-Hâc Mahmud Ağa b. Ebûbekir nâm kimesne meclis-i şer‘-i enverde sâhibe-i arzuhâl Hamâmî Emine bt. el-Hâc Osman nâm Hatun’un zevci ve tarafından husûs-ı âti’l-beyândan vekîl olduğu zâtını ârifân es-Seyyid Osman b. İbrahim ve Mehmed Beşe b. Hasan şehâdetleriyle sâbit olan Mehmed Efendi b. Ahmed muvâcehesinde müvekkile-i mezbûre Emine Hatun zimmetinde cihet-i karz-ı şer‘îden bin guruş alacağım olmağla hâlâ taleb ederim deyü da‘vâ ettikde vekîl-i mezbûr cevâbında müdde‘î-i mezbûrun ber-vech-i muharrer müdde‘âsını ikrâr lâkin müvekkilem zevcem mezbûrenin yedinde mülkü olan İstanbul’da yağlıkçılar içinde Nerdübanlı Câmi‘i karşısında kâin ma‘lûmü’l-hudûd bir bâb haffâf dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i mahsûse-i ma‘lûmeyi zevce-i müvekkile-i mezbûre Emine Hatun bin iki yüz on üç senesi Zilhiccesi gurresinden aded-i şuhûr beyân olunmadan beher şehr yirmişer guruşa mezbûr el-Hâc Mahmud Ağa’ya îcâr ve teslîm ol dahi istîcâr ve kabz edip târih-i mezbûrdan işbu sene-i mübâreke Rebî‘ülevvel gāyetine gelince kırk ay âlât-ı mezkûre taht-ı îcâresinde olmağla müddet-i mezkûrede zimmetinde müctemi‘ olan sekiz yüz kırk guruş zevcem müvekkile-i mezbûrenin deyn-i mezkûruna takās olunmak bi’l-vekâle murâdımdır deyü eylediği da‘vâsında merkūm el-Hâc Mahmud Ağa istintak olundukda âlât-ı mezkûre beher şehr dokuzar guruş onar para kirâ ile ancak sekiz ay taht-ı îcâresinde olduğunu ve müddet-i mezkûrede ancak iki yüz elli dokuz guruş zimmetinde îcâre-i mezkûreden müctemi‘ olduğunu ikrâr mâ‘adâyı inkâr etmekle müdde‘î-i vekîl-i mezbûr ziyâde müdde‘âsına lede’l-istimhâl ve’l-imhâl ikāme-i beyyine edememekle istihlâf ettikde merkūm el-Hâc Mahmud Ağa bi’l-muvâcehe gıbbe’t-tahlîfü’ş-şer‘î mûcebiyle vekîl-i merkūm ziyâde müdde‘âsıyla bilâ-beyyine mu‘ârazadan ba‘de’l-men‘ merkūm el-Hâc Mahmud Ağa’nın îcâre-i mezkûreden mu‘terif olduğu iki yüz elli dokuz mârru’z--zikr müdde‘âsı olup vekîl-i mezbûrun bi’l-vekâle ikrâr eylediği bin guruşun ol mikdârına takāsan tenzîl olundukda bâkīsi olan yedi yüz kırk bir guruşu müdde‘î-i merkūm el-Hâc Mahmud Ağa’ya edâ ve teslîme müvekkile-i merkūmeye izâfetle vekîl-i mezbûr Mehmed Efendi’ye tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-7 min-C sene [1]217