İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 394 Hüküm no: 460 Orijinal metin no: [66b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sahak v. Manas’ın, bir bab tütüncü gediğini Mihal v. Manol’a sattığı Tütüncü gediği mübâya‘ası Ma‘rûz İstanbul hısnı ebvâbından Bahçekapısı dâhilinde Taşhanda mütemekkin sarraf tâifesinden Sahak v. Manas nâm zimmî tarafından husûs-ı âti’l-beyânda vekîl olduğu Estefan v. Ohan ve Artin v. Agob şehâdetleriyle zâhir olan Manas v. Markar nâm zimmî meclis-i şer‘-i enverde bâ‘isü’l-i‘lâm Mihal v. Manol nâm zimmî muvâcehesinde bi’l-vekâle takrîr-i kelâm edip müvekkilim mersûmun yedinde mülkü olan İstanbul’da Yeni Câmi‘-i şerîfi kapısı ittisâlinde kâin ma‘lûmü’l-hudûd bir bâb tütüncü dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i mahsûsa-i ma‘lûmeyi tarefeynden bi’l-icâb ve’l-kabûl şürût-ı müfsideden âri bi-safka-i vâhide bey‘-i kat‘î ile tütüncüler esnâfının bâ-berât-ı âlî kethüdâsı İbrahim Ağa hâzır olduğu hâlde ben bi’l-vekâle bin guruş semen-i makbûz mukābelesinde mesfûr Mihal zimmîye bey‘ ve temlîk ve teslîm eylediğimde ol dahi ba‘de’l-iştirâ ve’l-kabz mebî‘-i mezkûrun tağrîr ve gabnine müte‘allika da‘vâdan dahi tarefeynden her birimiz âharın zimmetini bi’l-asâle ve bi’l-vekâle ibrâ etmemizle fîmâ ba‘d âlât-ı mezkûrede müvekkilim mezbûrun alâka ve medhali kalmayıp mersûm Mihal zimmînin mülk-i müşterâsı olmuşdur dedikde mesfûr Mihal zimmî ba‘de’t-tasdîk âlât-ı mezkûre müvekkkil-i mezbûr Sahak zimmînin üzerinden ref‘ ve kendi üzerine mülkü olmak üzere kaydolunup yedine sûret i‘tâ buyrulmasını mesfûr Mihal zimmî istid‘â eylediği İstanbul Mahkemesi’nden huzûr-ı âlîlerine i‘lâm olundu. Fî-9 min-C sene [1]217