İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 397 Hüküm no: 462 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Ağa b. Mehmed’in, kasaplar kethüdalığını kendi rızasıyla Halil Ağa’ya bıraktığı Kasablar kethüdâsı nasbı Ma‘rûz Âsitâne-i aliyye ve bilâd-ı selâse ve tevâbi‘inde kâin kassabân-ı ganem esnâfının ihtiyâr ustalarından el-Hâc Hâfız Mehmed Emin ve el-Hâc Ahmed ve es-Seyyid Ömer v el-Hâc Halil ve Yusuf vesâirleri meclis-i şer‘-i enverde esnâf-ı mezbûreden el-Hâc Halil Ağa b. Mehmed mahzarında her biri takrîr-i kelâm edip beher sene esnâfımızın ihtiyâr ustaları re’yleriyle umûr ve husûslarımızı rü’yet için bir kethüdâ nasb olunmak mu‘tâd-ı kadîm olduğundan mâ‘adâ kethüdâmız es-Seyyid el-Hâc Halil Ağa b. es-Seyyid Ahmed nâm kimesne işbu sene-i mübârekede hacc-ı şerîfe azîmete niyet edip rızâsıyla kethüdâlık-ı mezbûrdan keff-i yed etmekle azl olunup yerine esnâf-ı mezkûremizin emin ve mu‘temed ve muhtârı olup vücûhla kethüdâlık uhdesinden gelmeğe kādir olan merkūm el-Hâc Halil Ağa esnâf-ı mezkûremiz üzerine kethüdâ nasb ve ta‘yîn buyrulmak matlûbumuzdur dediklerinde esnâf-ı mezbûre ustalarının takrîr-i meşrûhları vâkı‘a mutâbık ve nefsü’l-emre muvâfık olduğu lede’l-ihbâr zâhir olmağla merkūm el-Hâc Halil Ağa esnâf-ı mezkûre üzerine kethüdâ nasb ve ta‘yîn olunup lâkin ber-mûceb-i şürût-ı nizâm merkūm el-Hâc Halil Ağa’nın kethüdâlığını müekked merhûm ve mağfûrun leh Sultan Abdülhamid Hân hazretlerinin evkāf-ı celîleleri mütevellîlerinden yedine temessük i‘tâ olunması iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî-9 C min sene [1]217