İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 397 Hüküm no: 463 Orijinal metin no: [67a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Halil b. Abdullah’ın geçimsiz ve kötü ahlaklı olmasından dolayı mahalleden çıkarıldığı Mahalleden ihrâc Ma‘rûz İstanbul’da Çerağî Hasan Mahallesi İmâmı es-Seyyid Osman Efendi ve Müezzini Ahmed Efendi ve ahâlîsinden es-Seyyid Ahmed ve İsmail ve İbrahim Ağa ve es-Seyyid Ahmed Efendi ve es-Seyyid Mustafa ve el-Hâc Mustafa ve diğer İsmail ve Ahmed ve el-Hâc Hüseyin Ağa ve Salih Efendi ve Hasan Ağa’dan her biri meclis-i şer‘-i şerîf-i enverde mahalle-i mezbûre ahâlîsinden Yağlıkçı es-Seyyid Halil b. Abdullah muvâcehesinde mezbûr es-Seyyid Halil mahallemiz sâkinlerinden olup lâkin kendi ırzıyla mukayyed olmayıp hadîdü’l-lisân ve bed-zebân olduğundan mâ‘adâ mahallemiz sâkinelerinden ehl-i ırz makūlesi nisâların bazısının menzillerine duhûl edip ol vechile cümlemizin mezbûrdan emn ve rahatımız meslûb olmuşdur deyü mezbûr es-Seyyid Halil’in sû-i hâlini muvâcehesinde her biri ihbâr ve mahalle-i mezbûreden âhar mahalle naklini istid‘â eyledikleri İstanbul Mahkemesi’nden huzûr-ı âlîlerine i‘lâm olundu. Fî-14 min C sene [1]217