İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 398 Hüküm no: 464 Orijinal metin no: [67a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zenciye Mâhir nâm-ı diğer Halime’nin hürriyetini ispat etttiği Zenciye hürriyetini isbât Ma‘rûz Ber-vech-i âtî ıtkını iddi‘â eden derûn-ı arzuhâlde mezkûratü’l-ism zenciye Mâhir nâm-ı diğer Halime meclis-i şer‘-i enverde mevlâsı olup gayr-ı reşid olan zü‘emâdan Mehmed Salih Ağa b. el-Hâc İbrahim’in bâ-hüccet vasîsi sâhib-i arzuhâl hâcegân-ı dîvân-ı hümâyûndan İbrahim Münib Efendi b. Osman Efendi tarafından husûs-ı âti’l-beyânda vekîl olduğu Hacı Mahmud b. Mahmud ve Ahmed b. Ali nâm kimesneler şehâdetleriyle mahzar-ı hasm-ı câhidde sâbit ve sübût-ı vekâletine hükm-i şer‘î lâhık olan es-Seyyid İbrahim Efendi b. Mustafa mahzarında ben mezbûr Mehmed Salih Ağa’nın yedinde rakīka câriye-i memlûkesi iken mezbûr Mehmed Salih Ağa tammü’l-akl olup tasarrufâtı nâfize olduğu hâlde bin iki yüz on altı senesi Zilka‘desinin on dokuzuncu günü beni malından tahrîr ve azâd ve kayd-ı rıkdan ıtlâk edip ol vechile hürriyet-i ârızâ ile hürre oldukdan sonra on beş gün mürûrunda mevlâm mezbûr Mehmed Salih Ağa muhtelü’d-dimâğ olup müvekkil-i mezbûr bâ-hüccet umûrunu rü’yete kıbel-i şer‘den vasî nasb ve ta‘yîn olunduğuna binâen bana rakīka câriye olmak üzere fuzûlî vaz‘-ı yed eder suâl olunup sebilim tahliyye olunmak murâdımdır deyü da‘vâ ettikde vekîl-i mezbûr cevâbında müdde‘iye-i mezbûre gayrıreşid-i mezbûrun ber-vech-i muharrer câriye-i memlûkesi olduğunu ikrâr lâkin kendiye cünûn târi olduğu hînde ber-vech-i muharrer i‘tâk etmişdir deyü tammü’l-akl olduğu hâlde itâkını inkâr etmekle müdde‘i-i mezbûre ber-vech-i muharrer merkūm Mehmed Salih Ağa tammü’l-akl olup tasarrufâtı nâfize olduğu hâlde târih-i mezbûrda ber-vech-i muharrer kendiyi i‘tâk eylediğini lede’t-tezkiye adl ve makbuli’ş-şehâde oldukları ihbâr olunan Camcı Mehmed Emin b. Abdullah ve Mehmed b. Musa nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebiyle müdde‘iye-i mezbûre zenciye Mâhir nâm-ı diğer Halime’nin ıtkına ba‘de’l-hükm sebîli tahliyye olunduğu İstanbul Mahkemesi’nden huzûr-ı âlîlerine i‘lâm olundu. Fî-12 min C sene [1]217