İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 399 Hüküm no: 465 Orijinal metin no: [67a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Hüsrev Efendi vakfı tevliyetinin evlad-ı vâkıftan Şerife Ayşe bt. Seyyid Mehmed Ârif’e tevcih olunduğu Molla Hüsrev tevliyeti tevcîhi Ma‘rûz Nezâret-i dâ‘îlerinde âsûde evkāfdan merhûm ve mağfûrun leh Molla Hüsrev Efendi Vakfı’nın evlâd-ı evlâd-ı evlâdından sagīre Şerîfe Âişe bt. es-Seyyid Mehmed Ârif’in bâ-hüccet vasîsi es-Seyyid Ebûbekir b. el-Hâc Hüseyin nâm kimesne Çarşamba günü arz odasında huzûr-ı âsafânelerinde ma‘kūd meclis-i şer‘-i enverde tevliyet-i mezkûreye bi’l-meşrûta vaz‘-ı yedi mütehakkık olan kezâlik evlâd-ı evlâd-ı vâkıfdan mu‘arrefetü’z-zât Şerîfe Zeliha bt. es-Seyyid Yusuf nâm Hatun ile bi’d-defa‘ât terâfu‘larında işbu arzuhâle [67b] ta‘lîk olunan diğer arzuhâl hâmişinde mastûr derkenâr nâtık olduğu üzere vâkıf-ı merhûm-ı mûmâ-ileyh vakfının tevliyetini hayatda oldukça kendiye ve ba‘dehû oğlu Celaleddin’e ve ba‘dehû evlâd-ı evlâd-ı evlâdlarına batnen ba‘de batnin ve neslen ba‘de neslin şart ve ta‘yîn edip ve tevliyet-i mezkûreye evlâd-ı evlâd-ı vâkıfdan vasîsi olduğum sagīre-i mezbûrenin babası mezbûr es-Seyyid Mehmed Ârif şart-ı vâkıf üzere mutasarrıfe iken fevt olup tevliyet-i mezkûre mahlûl olmağla vasîsi olduğum sagīre-i mezbûre Şerîfe Âişe evlâd-ı vâkıfdan vakf-ı mezbûra mütevellî olan Ali’nin kızı Ayşe’nin oğlu mezbûr es-Seyyid Mehmed Ârif’in kızı ve mezbûre Şerîfe Sâliha Hatun dahi mezbûr Ali’nin kızı Âmine’nin kızı olup ol vechile sagīre-i mezbûreden merkūme Şerîfe Sâliha Hatun bir derece mukaddem olup lâkin mecerred sagīre-i mezbûre dahi evlâd-ı vâkıfdan olmağla tevliyet-i mezkûre babası müteveffâ-i mezbûrun mahlûlünden sagīre-i mezbûra tevcîh olunmak bi’l-vesâye matlûbumdur deyü da‘vâ ettikde fi’l-hakīka tevliyet-i mezkûre batnen ba‘de batnin evlâda meşrûta olup amel-i kadîm dahi bu vechile olduğu derkenârlardan ve mürtezika-i vakıfdan İmâm Süleyman Efendi b. İbrahim ve yine İmâm Mehmed Efendi b. el-Hâc Mehmed ve yine İmâm Abdülahad Efendi b. Abdurrahim ve kâtib-i vakıf Mustafa Efendi b. Yusuf ve Müezzin Ahmed Efendi b. Abdullah nâm kimesnelerin ihbârlarından müstebân olmağla nevbet-i tasarruf-ı tevliyet mezbûre Şerîfe Sâliha Hatun’un olduğu vasiyy-i mezbûra tefhîm olundukda vasiyy-i merkūm es-Seyyid Ebûbekir dönüp mezbûre Şerîfe Sâliha Hatun el-yevm vâkıf-ı mûmâ-ileyhin oğlu merhûm Mustafa Efendi’nin evlâd-ı evlâda meşrûta vakfının bâ-berât-ı âlî bi’l-meşrûta mütevellîsi olup lâkin merhûm-ı mezbûr Mustafa Efendi vakfının tevliyeti işbu yedimde olan dokuz yüz seksen senesi târihiyle müverraha bir kıt‘a sûret-i vakfiyesi nâtıka olduğu üzere merhûm-ı mûmâ-ileyh Mustafa Efendi babam merhûm Molla Hüsrev Efendi’nin vakfına mütevellî olan benim vakfıma mütevellî olmaya deyü meşrût olmağla bu sûretde tevliyeteyn-i mezkûreynin cemî‘-i hilâf-ı şart-ı vâkıf olmağın zikr olunan Hüsrevzâde Efendi Vakfı’nın tevliyeti mezbûre Şerîfe Sâliha Hatun ref‘inden sagīre-i mezbûre merhûm-ı mûmâ-ileyh Hüsrevzâde Efendi Vakfı’nın dahi evlâd-ı evlâdından olduğuna binâen sagīre-i mezbûreye tevcîh olunmak murâdımdır deyü bir kıt‘a sûret-i vakfiye ibrâzıyla da‘vâ ettikde mezbûre Sâliha Hatun inkâr etmekle mahz-ı şart-ı vâkıfda tesâmu‘la şehâdet makbûle olmayıp asıl tescîli dahi isbât-ı müte‘assir olduğundan mâ‘adâ vasiyy-i mezbûrun ibrâz eylediği sûret-i vakfiye ile amel oluna gelmediği ve tevliyeteyn-i mezkûreteyen üç def‘a cem‘ olduğu kezâlik arzuhâl hâmişinde mezkûr derkenârlardan müstefâd olduğundan gayrı merkūme Şerîfe Sâliha Hatun’un yedinde olup arz odasında ibrâz eylediği mazmûnu sâbit olmayıp kadîmden amel olunagelmeyen vakfiye ile amel olunur mu olunmaz mı deyü verilen fetâvâ-yı şerîfe mûcebince vasiyy-i mezbûrun da‘vâ-yı mezkûreleri meşrû‘a olmamağla iltifât olunmayıp lâkin sagīre-i mezbûre Şerîfe Âişe evlâd-ı vâkıfdan olup mahâll-i merhamet olduğu zâhir olmağla mezbûre Şerîfe Sâliha Hatun dahi re’y-i âsafâneleri üzere sagīre-i mezbûre Şerîfe Ayşe’ye beher şehr on beşer guruş vermeğe ta‘ahhüd etmekle mârrü’l-beyân merhûm-ı mûmâ-ileyh Molla Hüsrev Efendi’nin tevliyeti dahi vazîfe-i mersûmesiyle şart-ı vâkıf üzere merkūme Şerîfe Sâliha Hatun’a tevcîhi iktizâ eylediği İslâmbol Mahkemesi’nden huzûr-ı âlîlerine i‘lâm olundu. Fî-9 min C sene [1]217