İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 400 Hüküm no: 466 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Oskoher bt. Ağya ve kızı Sima bt. Ohanes’in evlerine, Sarrak v. Tarus’ın evine bakan tarafından açtıkları pencerelerin kapatılması gerektiği Pencere keşfi Ma‘rûz Sâdır olan fermân-ı âlîlerine imtisâlen zikri âtî husûsu mahallinde bi’l-mu‘âyene istimâ‘ ve fasl-ı hasmı için savb-ı şer‘-i enverden irsâl olunan Kâtib el-Hâc Mehmed Efendi hâssa mi‘mârı hulefâlarından Mustafa ve es-Seyyid Ali Halîfeler ile İstanbul’da Nişancıpaşa Mahallesi’nde Cüceçeşmesi kurbünde vâki‘ arzuhâl eden Setrak v. Toros zimmînin menziline varıp huzûr-ı Müslimînde ve ba‘de akdi’l-meclis mersûm Setrak zimmî meclis-i ma‘kūd-ı mezkûrda nezâret-i dâ‘îlerinde âsûde Kocamustafapaşa Vakfı’ndan olup mersûm Setrak zimmînin verâsında kâin ma‘lûmü’l-hudûd ve bir bâb menzilin ale’l-iştirâki’s-seviyy mutasarrıfları ve şahısları ta‘rîf-i şer‘î ile mu‘arrefeler olan Oskohi bt. Ağya ve kızı Sima bt. Ohannes nâm Nasrâniyeler muvâcehelerinde vakf-ı mezbûr mütevellîsi Mehmed Nurullah Ağa b. Hüseyin’in tarafından mürsel vekîl-i şer‘îsi Hâfız el-Hâc Hüseyin Efendi hâzır olduğu hâlde mersûmetân Sima ve Oskohi Nasrâniyelerin işbu mu‘âyene olunan menzillerinin çatı arasında kâin odadan ihdâs eyledikleri üç aded ve ulyâda kâin sofasından ihdâs eyledikleri iki aded vustâda vâki‘ sofasından kezâlik ihdâs eyledikleri iki aded pencere ve havlu ve duvarından dahi ihdâs eyledikleri iki aded ki cem‘an dokuz aded sagīre pencerelerden menzilimin makarr-ı nisvân olan mevâzi‘ine nezâreti ve zarariyeti olmağla ba‘de’l-keşf ve’l-mu‘âyene zarar-ı şer‘îsi men‘ ü def‘ olunmak murâdımdır deyü da‘vâ eyledikde mi‘marân-ı mezbûrân ve hâzirûn-ı mezbûrûn nazar eylediklerinde fi’l-hakīka mersûmetân Oskohi ve Sima Nasrâniyelerin ihdâs eyledikleri dokuz aded sagīre pencerelerinden müdde‘î-i mersûm Setrak zimmînin menzilinin makarr-ı nisvân olan mahallerine nezâret ve zarar-ı beyyini olduğunu ihbâr ve zikr olunan pencereler muhdes olduğunu dahi merkūmetân tasdîk etmeleriyle mûcebince sâlifü’z-zikr pencerelerin nezâretini def‘a mersûmetân Oskohi ve Sima Nasrâniyelere tenbîh eylediğini Mevlânâ-yı mezbûr mahallinde ketb ve tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği tescîl ve İstanbul Mahkemesi’nden huzûr-ı âlîlerine i‘lâm olundu. Fî-16 min C sene [1]217